FİFA prezidentliyinə namizədliyini irəli sürən qətərli iş adamı Məhəmməd bin Həmmam rüşvət ittihamlarını araşdırmalı olan etika komitəsindəki müzakirələrdən bir gün əvvəl namizədliyini geri götürüb. Asiya Futbol Konfederasiyasının 62 yaşlı rəhbəri dünya futbolunda əsas rəsmi post uğrunda mübarizədə FİFA-nın hazırkı prezidenti Zepp Blatterin əsas rəqibi idi.
Məhəmməd bin Həmmam bəyan edib ki, FİFA-nın nüfuzunun azalmasından narahatdır. “Mənim üçün sevimli adın iki nəfərin rəqabəti üzündən çirkaba bulaşdırılmasına imkan verə bilmərəm”, - qətərli iş adamının bəyanatında deyilir.
FİFA prezidenti seçkiləri iyunun 1-də Sürixdə keçirilməlidir.
