ابراهيم بي جعفرزاده نين فعاليتلرينين موختليف يؤنلري (1)
1-عائيله تاثيري
ابراهيم بي جعفرزاده بير فعالايدي هر كيمله، هر فضادا، هريئرده، حتي دوستاقدادا اولسايدي، اوردا تاثيرين قوياردي و قويموشدو. بو قهرمان، فعاليت فضالارين محدودلاشديرماميشدي، بير يؤنلو (بعدي) دگيلدير. بير جوملهده ابراهيم اولان يئرده يالنيز بير بحث بير صحبت وارايدي اودا آذربايجان ميللي حركتيايدي و ميللي فيكرين نئجه گليشمهسي اونون دغدغهسيايدي.
بير چوخ فيكيرداشلاريميز كيمي چالیشماق فضالاري، يالنيز عائيله ديشندا تعريف ائتمهميشدير. اؤزوموزه قاييديب دريندن باخساق بعضي سابيقهلي فعاللاركيمي اؤزموزو زحمته سالماميشيق، قارداش، باجي، عمي، عمه، دايي ... و اونلارين اوشاقلاريني حتي بعضن اؤز ائولادلاريميزي اونودوب فيكريميزله تانيش ائتمهميشيك، درديميزي عائيله نين ديشيندا تاپمیشیق. يولو دوزلتمهميش، ساف ائتمهميش يولا دوشموشوك. اؤز گؤزوموزده تيري گؤرمهميشيك اما اؤزگهنين قاتيغيندان قيلي سئچميشيك. بو سووالا نئجه جاواب وئرمهليييك بيزكي ائيلهيهبيلمهميشيك چوخ سئون آداملاريميزا و بيزي ان چوخ سئون اينسانلارا تاثير قوياق، باشقالاري و بيزي دريندن تانيمايانلار نئجه بيزه اينانسينلار؟!
ابراهيم بي جعفرزاده بو قونودا بير اؤرنك ايدي. نئجه تاثير قويدوغونو بوراخيرام باشقا زامانا، آمما اونون ياس تؤرهنينده عائيله سينين نئجه ديرهنمهييني گرچك اولاراق يالنيز روايت ائدهجهيم. بير ديرهنمك كي بير ياس تؤرهنيندن بير بؤيوك حماسه ياراتدي، ياس تؤرهنيني بير تيريبونا چئويردي، ميللت دردلريني، اؤفكهلريني بيربيريله پايلاشديلار و ايچريلريني، اورهك سؤزلريني آذربايجانا اوز توتوب باغیريب، بوشالديب سسلنديلر.
ابراهيم بي جعفرزادهنين قهرمان عائيله سي هئچ زامان فشار آلتيندان چيخماديلار. بيرياندان اوچ دسته گوللرين الدن وئرميشديلر، بيرياندان تشييع جنازه اولماياجاق، دانيشيق اولماياجاق، شوعار اولماياجاق، سس اولماياجاق، توركي يازي اولماياجاق، اولماياجاق، اولماياجاق، ... بومبارديمان آلتيندا قالميشديلار.
گئجه ساعات 11ده پایگاه فرماندهینین امری و ديگرلرينين امري ، توركجه يازيلميش باش ساغليغي پارچا يازيلاري يئره اندیرهنمهدی.ابراهيم بي تاثير قويدوغو قهرمان عائيله نين بو فشارلارا معروض قالديغي حالدا جاوابلاري هميشه بو اولموشدور: "مراسيم ابراهيم و انون فيكيرداشلاري و بيزيم ايستهديگيميز كيمي كئچمهليدير. كيمسه بيزبم پلانيميزي انگللهيه بيلهنمز. سيز اؤزونوزو سيخمايين، ايشينيزده اولون. بير قدمده دالي اوتورماياجاغيق بو قهرمان عائيله نين بئله ديرهنمهسي هامييا اورهك وئردي. عزيزلرينين جنازهلري " آذربايجان سنين باشين ساغ اولسون" شوعاريله عظمتله تشييع اولدولار، توركجه يازيلميش باش ساغليغي پارچا يازيلارلا يولا سالينديلار، ايستهديگيميز يئرده حؤرمتله ناماز قيليندي، تورپاغا تاپشيريليب آغلاشديق، مراسيميميز ابراهیم ایستهدیـییکیمی) قاباغا گئديب قورتولدو.
ابراهيم بي جعفرزاده يورولمادان، اينجيمهدن، داريخمادان واخت قويوب فيكريني يايميشدير. بو قهرمان، موباريز عائيله ده اونون تلاشلارينين سونوجودور.
محمد عباسپور
