ابراهيم بي جعفرزاده نين فعاليتلرينين موختليف يؤنلري (2) - ایکینجی بؤلوم
1-ابراهيم بي جعفرزاده بير نفر دییلدی
اینسانی قوراللار اساسیندا، اینسانلار بؤیودوکجه، یاشا دولدوقجا بیلگیلری آرتار، دوشونجهلری فرقلهنر. شخصلرین او حالینا و زامانینا عایید دوستو، موصاییبی، یولداشی، فیکیرداشی، سیرداشی اولار. هامیمیز بیر آز گئچمیشه دؤنوب آرخامیزا باخساق اوشاقلیقدا، مدرسهده، کوچهده، محللهده، هابئله دانیشگاهدا چوخلو یولداشلاریمیز واریدیکی ایندی هئچ بیلمیریک هاردادیرلار، نئیلهییرلر.
یوخ، یالنیش آنلامییاق، بیر آزینین سببی مسافه اولسادا بیر چوخونون آیریلیق سببی، دوشونجه فرقلنمهسیدیر. بیر سیراسینین دوشونجهسی گلیشمهییب، گئریده قالیبدیر (دیققت ائدهک سواد دئمیرم، دوشونجه دئییرم!) و یا دوشونجهسی محیطی و باشقا سببلر اساسیندا دهییشیلیبدیر. فیکیرداشلاریمیزی، هاردا اولسالاردا، دونیانین او باشینا گئتسهلرده هر آراجلا، هر یوللا تاپیب، تاپیشیب، گؤروروشوب، دانیشیب ان آزی یازیشیریق. آمما دوشونجه بیرلیگی اولمایان اوشاقلیق یولداشیمیز بئله قونشوموز اولسادا بلکه داها سالاملاشمیریق.
ابراهيم بي جعفرزاده بو آچیداندا فرقلیایدی. ابراهيم بي جعفرزاده بير نفر دهییلدیکی بیر سیرا محدود و بیر سطحده اینسانلارلا ایلیشگیسی اولوب و فعالییت چئورهسین اونا گؤره گؤتوروب اؤزون اقناع ائده. اونون چئورهسی یالنیز گلیشمیش میللی فعاللار دهییلدیر. اونون چالیشما سینیری او قدهر گئنیشایدی کی یئددی یاشیندا اوشاقدان یئتمیش یاشینا، ساوادسیزی- ساوادلیسی، اکینچیسی، دوقتورو، موهندیسی، کارمندی، حتتا موخالیفی و ... اوندا یئرلهشیردی. چونکو اونون چئوره و سینیری "آذربایجان" ایدی. ابراهیم بی دئمیردی گلیشمهییب، او دئییردی گلیشدیرمهلییک. او دئمیردی دوشونجهسی فرقلیدیر، او دئییردی دوشونجهسین دهییشیب آذربایجانلاشدیرمالیییق و... .
ابراهیم بی بیر اوشاقلا دانیشاندا سانکی بیر اوشاقایدی، بیر آغ ساققاللا دا آغساققالا اویغون دانیشیردی. آنجاق هامیدان بیر میللتچی، آذربایجانچی یاراتماق ایستهییردی. بو قونودا هئچ دویماق بیلمزیدی و دویمادی. ابراهیم بی اولان یئرده بیر قونو وارایدی، اودا یالنیز آذربایجان، میللی منافع، میللی حرکتین چتینلیکلری و اونلارا عایید مسئلهلر ایدی. بیز ابراهیمی ایتیرندن سونرا آنلادیق سانکی نئچه ابراهیم عئینی زاماندا بیزیمله یاشیییردی و بوگون آذربایجان نئچه قهرمان ابراهیم-ینی ایتیریبدیر. "باشین ساغ اولسون آذربایجان"
بی، کیمسهنی اوزوندن اینجیتمهمیشدی و کیمسهیه، حتتا میللی حرکتهده بوشلو قالمادی. چالیشمالاریلا، تربییت ائتدیگی فعاللارلا، گؤستردیگی یوللارلا، زیندانلاریلا و... بورجونو اؤدهدی.
ابراهیم بی بیر یولداشینی خیابانی یوروش و گؤستریشه شراییط موساعد اولمادیغی اوچون هلهلیک بکله دئیه، اقناع ائدهنمهمیشدیر. بو دونیادان گئدندن سونرا، اؤزو و حؤرمتلی خانیمی "مینا خانیم کهربایی" و گؤزهل بالالاری "آیلا" اللر اوسته داشینان حالدا جسمی اولاراق گوجو اولماسایدیدا، روحو ایله بیر تظاهورات یارادیب سون بورجوندا اونا اؤدهییب و ابدی دونیایه کؤچدو. بلکهده او یولداشی اؤز اورهیینده دئمیشدیر « ابراهیم بی سونوندا اولدو کی بیر سؤز دییهسن یئرینه قویا بیلمهیهسن ». آمما ائله بو فیکیردهایدی حماسهنین یارانماسی اونون قولاغینا وورغولادی « ابراهیمین سؤزو سؤزدور ». و اونو آغلار گؤزلریله ابراهیم-ین یولونو دوام ائتمهیه داها آرتیق ایناندیردی.
آذربایجان و اونون بوتون تاریخی سرحدداتی، اونون آتینین چاپدیرما مئیدانیایدی. آذربایجانین میللی منافعین اؤز منافعهسی تعریف ائتمیشدی. هئچ زامان اؤز منافعهسین و باشقالارینین منافعهسین آذربایجانین میللی منافعهسیندن اوستون توتمادی. بو قونودا آذربایجانین میللی منافعیندن مودافعه ائدن آندا، بیرسیرالارینین شخصی، حزبی، تشکیلاتی و... منفعتلریله اوست-اوسته دوشمهسهایدی ابراهیم بیدن اینجیییب، آجبخلاناردیلار و هئچ بیر واسیطه و باریشدیریجی ابراهیمین نظرین دهییشهنمزدی. ابراهیم بی کیمسهایله دارتیشماسی اولسایدی یالنیز آذربایجان مسئلهسی ایدی. بو اساسدا بونا توخونمالاردا اولموشدو حتتا تخریباتدا آپاریلمیشدی، آمما بونلارین هئچ بیری اونو یوروب سیندیرانمادی.
ابراهیم بی جعفرزاده-نین روحو بیزیمله یاشیییر، یاشییاجاق و یاشاداجاغیق. گون او گون اولا هامیمیز، بوتون آذربایجانلیلار، تورکلر ابراهیم بی کیمی یالنیز آذربایجانین اوغورون، شرفین، شان-شهرتین و منافعین دوشونک.
آبان – 1390 - محمد عباسپور
