GünAzTv: Jurnalistlər İrana niyə vizasz gedə bilməyəcək "İran dövləti jurnalistlərin orada gördüklərini Azərbaycan ictimaiyyətinə çatdırmalarından qorxur" İran birtərəfli qaydada Azərbaycanla viza rejimini ləğv edib. 2010-cü il fevralın 1-indən etibarən Azərbaycan vətəndaşları İrana vizasız gedə bilirlər. Amma qəribədir ki, Azərbaycan jurnalistləri istisnadır. İran rəsmiləri bildirib ki, Azərbaycan jurnalistləri İrana getmək üçün viza almalıdırlar. İranın bu qərarı Azərbaycan ictimaiyyətinin, media kapitanlarının narazılığına səbəb olub. "Təzadlar" qəzetinin baş redaktoru Asif Mərzili "OLAYLAR"a açıqlamasında İran tərəfinin qərarını təqdir etmədiyini deyib. Baş yazar deyib ki, görünür, İran dövləti jurnalistlərin orada gördüklərini Azərbaycan ictimaiyyətinə çatdırmalarından qorxur. "Açıq fikir" qəzetinin şef redaktoru Eldəniz Elgün də İranın viza ilə bağlı qərarından narazıdır. Şef-redaktor hesab edir ki, vizanı götürməklə İran Azərbaycanda istədiyini həyata keçirəcək. Eldəniz Elgün ümumiyyətlə İranla vizanın ləğv edilməsinin əleyhinə olduğunu deyib.