GünAzTv: Türkiyə Böyük Millət Məclisində deputatlar arasında baş verən qarşıdurma indi də söz davası müstəvisinə keçib. Baş nazir Rəcəb Tayyib Ərdoğan baş verən hadisəni müxalifətin təxribatı adlandırıb. Müxalifət isə parlamentdəki qarşıdurmada iqtidarı ittiham edir. Rəcəb Tayyib Ərdoğan bunun iqtidara qarşı təxriatların bir hissəsi olduğunu bildirib. Ərdoğan partiyadaşlarından birinin onun haqqında peyğəmbərlik bənzətməsinə də sərt reaksiya verib, və onun haqqında ciddi tədbirlər görülməsini tapşırıb. Artıq həmin şəxs partiya sıralarından istefa verdiyini açıqlayıb. Baş nazir həyat yoldaşının Gülhanə Hərbi Tibb Akademiyasına baş örtüyünə görə buraxılmamasına da toxunub. Bu arada parlamentdəki qarşıdurmayla bağlı Türkiyədə siyasi gərginlik yaşanır. Ərdoğan barədə «Yeni peyğəmbər» bənzətməsini gündəmə gətirən Milliyyətçi Hərəkat Partiyası parlamentdəki hadisədə iqtidarı ittiham edib. Cümhuriyyət Xalq Partiyası isə qarşıdurmanın iqtidarın antidemokratik hərəkətinin nəticəsi olduğunu bəyan edib. Partiya rəsmiləri baş nazirin müavini Bülənt Arınçın partiyadaşları olan spiker müavini Güldal Mumcunun otağına hücum çəkməsini kəskin pisləyiblər. İttihamları rədd edən Bülənt Arınç isə parlamentdə baş verənlərdə spiker müavinin günahkar olduğunu deyib. Bildirib ki, Cümhuriyyət Xalq Partiyası üzvü olan Güldal Mumcu tərəfsiz idarəetmə sərgiləmir. İqtidar partiyası Milliyyətçi Hərəkat Partiyasının üzvü Osman Durmuşu mənəvi dəyərləri təhqirdə ittiham edib. Baş vermiş hadisədən təəssüfləndiyini bildirən parlamentin sədri Məhmət Əli Şahin siyasətçiləri təhqirdən çəkinməyə çağırıb.