Noyabrın 2-də mediaya açıqlamasında Rafael Qrossi deyib ki, agentlik ötən fevral ayından bu yana İranın nüvə təsisatlarının müşahidə videolarına, onlarda depolanmış məlumatların manipulyasiyasının qarşısını almaq üçün onlayn zənginləşdirmə monitorlarına və rəqəmsal möhürlərə daxil ola bilməyib.
“Mən yalnız onu deyə bilərəm ki, biz son dərəcə buludlu bir səmada uçuruq. Bəli, biz belə sıx buludlar arasında uçmaqdayıq və bu yolumuza davam etdirə bilərik, lakin uzun bir müddət üçün yox. Daha doğrusu, İranın nüvə fəaliyyəti ilə bağlı indiki vəziyyət çox davam edə bilməyəcək.
Hesab edirəm ki, agentlik müfəttişləri İrana qayıtmalı, İranın nüvə mərkəzlərində nə ilə məşğul olmasından xəbərdar olmalıdır. Çünki bu beynəlxalq birliyin xeyrinə olduğu kimi həm də iranlıların xeyrinədir.
İranlılar apardıqları nüvə proqramının qeyri-hərbi və dinc xarakter daşıdığını iddia edirlər. Hesab edirəm ki, onlar bununla bağlı zəmanət verməli, nüvə mərkəzlərində nələr baş verməsi barədə bizi məlumatlandırmalıdırlar.
Lakin əgər bu kimi problemlər həll edilməsə, o zaman biz qeyri-müəyyən bir vəziyyətə daxil olacağıq, mən isə ümid edirəm ki, belə olmasın”, -deyə Beynəlxalq Atom Enerjisi Agentliyinin baş direktoru Rafael Qrossi bildirib.
A.M
