GünazTV: Albaniya polisi oktyabrın 23-də bəyanat yayaraq İran rejiminin bu ölkədə fəaliyyət göstərən Xalq Mücahidləri Təşkilatına qarşı terror şəbəkəsinin üzvlərinin zərərsizləşdirilməsindən xəbər verib.
Məsələ ilə bağlı jurnalistlərə açıqlama verən Albaniya polisinin rəisi Ardi Veliu deyib ki, İrana bağlı terror şəbəkəsinin üzvləri qarşıdan gələn Novruz bayramı şənliklərində “3-cü Əşrəf” adı ilə tanınan Xalq Mücahidlərinin Tirana yaxınlığındakı qərargahına qarşı bir sıra terror hücumları planlaşdırıbmış: “Bu terror şəbəkəsi “Sepah”ın xarici əməliyyatlar üçün nəzərdə tutulan “Qüds” qüvvələri tərəfindən idarə olunub. Şəbəkə üzvləri həmçinin Türkiyədəki mütəşəkkil cinayətkar qruplaşmarla əlaqədə olaraq, terror planını həyata keçirimək üçün Xalq Mücahidləri Təşkilatının keçmiş üzvlərindən birinin əməkdaşlığından da istifadə edib. Bu terror şəbəkəsini, həm də İranın təhlükəsizlik orqanlarından olan iki yüksək rütbəli rəsmisi birbaşa Tehrandan yönləndirirmiş” –deyə Albaniya polisinin rəisi Ardi Veliu əlavə edib.
Ardi Veliu, terror şəbəkəsinin zərərsizləşdirilməsi ilə bağlı keçirilən əməliyyatın detallarını, terrorçuların yaxalanıb və ya nəzarət altında saxlanılmasını açıqlamayıb.
Xatırladaq ki, , əvvəllər İran rejiminə qarşı silahlı mübarizə aparan, hərbi qərargahları İraqda olan Xalq Mücahidlər Təşkilatının üzvləri, 2003-cü ildə Amerika ordusunun İraqa hücumundan sonra tərksilah edilib və bir müddətdən sonra onun 3 minə yaxın üzvü İraqdan Albaniyaya köçürülüb.
Zərərsizləşdirilən İrana bağlı terrorçular
Qeyd edək ki, son illər xarici ölkələrdə İran rejiminə qarşı mübarizə aparan yüzlərlə iranlı müxalif, ETTELAAT-ın və “Sepah”ın “Qüds” briqadasının mülki geyimli əməkdaşlarının həyata keçirdiyi terror aktları nəticəsində qətlə yetirilib.
İran Xalq Mücahidləri Təşkilatının Albaniyadakı "3-cü Əşrəf" qərargahı
A.M
