"Atalar sözləri və məsəllər" Elçin Qaliboğlu Bu yaxınlarda gənc, həvəskar folklor toplayıcısı Aslan Əsədovun toplayıb araya-ərsəyə gətirdiyi "Atalar sözü və məsəllər" adlı kitabı işıq üzü görüb. Maraqlıdır ki, 21 yaşlı Aslan ixtisasca filoloq deyil. Folklora maraq onda fitri bir keyfiyyətdir. Hazırda o, Memarlıq və İnşaat Universitetinin nəqliyyat fakültəsində təhsil alır. Bu gün Azərbaycanın zəngin, qədim mədəniyyət soraqlarının bizi sevməyənlər, xüsusən də ermənilər tərəfindən mənimsənildiyi barədə tez-tez yazırıq, ağız dolusu danışırıq. Amma bu qiymətli soraqların toplanması, kitablaşdırılması işi folklorçuların öhdəsinə düşür. Təbiidir, çörəyi ver çörəkçiyə, birini də üstəlik. Amma ki, əgər hər gəs bu sahədə əlindən gələni etsə, yəni zəngin şifahi xalq ədəbiyyatı soraqlarını toplasa, o zaman bu sərvətlərimizin çoxunu kitablaşdırıb sabaha çatdıra bilərik. Lakin təəssüf ki, çox zaman bu mənəvi sərvətin daşıyıcıları sinələrindəki xalq xəzinəsini də özləriylə qara torpağın altına aparırlar. O zaman ayılırıq ki, artıq iş işdən keçib. Kitabın toplayıcısı və tərtibçisi Aslan Əsədov yazır: "Xalqımızın özünəməxsus mentaliteti, nadir sənət nümunələri, zəngin folkloru var. Bu nadir inciləri sələflərimiz bizə çatdırmış, bizim də borcumuz bu milli sərvəti bizdən sonrakı nəslə çatdırmaqdır. Azərbaycanın qədim və sivilizasiyalı bir məskən olduğu çoxlarına bəllidir. Azərbaycanın istər şifahi, istərsə də yazılı ədəbiyyatı qədim Şərq mədəniyyətinin bir qolu olmaqla yanaşı özünün inkişaf etmiş bir zirvəsində dayanmaqdadır. Atalar sözü və məsəllərin yaranması bu gün də davam edir. Zaman-zaman bir çox müdrik insanların fikir və ifadələri də xalq içərisində nüfuz qazanaraq atalar sözü və məsəllər şəklinə düşüb. Bu nadir incilərimizə sahib çıxıb onları qorumalıyıq. Məni bu işə vadar edən səbəblər var: doğulub boya-başa çatdığım elin adət-ənənəsinə sevgi, hörmət, bir də mədəniyyətimizə, əxlaqımıza qarşı yabançı halları aşılayanlara tutarlı cavab vermək istəyi... Bir gün xarici jurnalların birində Azərbaycan-türk atalar sözlərinin təxminən orijinalına yaxın mənası ilə, başqalaşdırıldığını gördüm. Məsələn, "Dəmiri isti-isti döyərlər"; 1991-ci ildə Moskvada nəşr olunmuş jurnalda yazılmışdı: "Dəmiri müəyyən vəziyyətə gətirmək üçün onu əvvəlcə istiləşdir, sonra bərkiməmiş formaya sal. Belə misalların sayını çox artırmaq olar". Toplayıcı həmçinin Azərbaycanın tanınmış araşdırıcılarınının, toplayıcılarının bu sahədəki kitablarından da bəhrələnib, dəqiq mənbələr göstərib. Kitabda 4 minə yaxın atalar sözü və məsəllər toplanıb, bunlardan təxminən minə yaxını Aslanın özünün topladıqlarıdır. xalqcebhesi