Axund Xamneyi: “Mən nüvə danışıqları məsələsində səhv etdim”

SON XƏBƏRLƏR

Axund Xamneyi: “Mən nüvə danışıqları məsələsində səhv etdim”

2021.10.20, 07:36

Gunaz.tv

GünAzTV: İranın dini lideri axund Əli Xamneyi avqustun 13-də bir qrup tərəfdarı ilə görüşərək Qərblə İran arasında əldə edilmiş nüvə sazişindən və Amerika ilə müzakirələrdən danışıb.

Öz çıxışında, Amerika ilə birbaşa müzakirələr aparılmasını vacib sayan hakimiyyətdaxili bəzi qüvvələrə və onların bununla bağlı tələbinə toxunan Xamneyi deyib ki, o Vaşinqtonla hər hansı bir danışıqlar aparılmasına yasaq qoyub: “Nüvə danışıqları (“Bərcam”) məsələsi kökündən yaxlnış bir addım idi. Mən nüvə danışıqları məsələsində səhv etdim. Mən, sadəcə olaraq, bəzi cənabların israrı ilə müzakirələr aparılmasına icazə verdim və dedim ki, qoy bunu da təcrübə etsinlər. Lakin cənablar, danışıqlar zamanı nəzərdə tutulmuş müəyyən çərçivəyə riayət etməyərək təyin olunan qırmızı xətti də keçdilər.

Hesab edirəm ki, biz Amerika ilə təhlükəli danışıqlar oyununa yalnız o zaman girə bilərik ki, hər baxımdan, o cümlədən də iqtisadi, siyasi və mədəni baxımdan güclü olaq. Elə bir gücümüz olmalıdır ki, onun təzyiq və şantajları bizə təsir edə bilməsin. Lakin hazırkı durumda hesab edirəm ki, Amerika ilə müzakirələr aparılması bizim ziyanımızadır. Bu, yolverilməzdir.

Məhz həmin səbəbə görədir ki, vaxtilə İmam (Xomeyni) Amerika ilə müzakirələr aparılmasına qadağa qoydu. Mən də belə edir, hazırkı vəziyyətdə Vaşinqtonla hər hansı bir danışıqlar aparılmasını qadağan edirəm. Bundan başqa, hətta əgər biz Amerika ilə müzakirələr aparılmasına qərar versəydik belə, onun indiki hökuməti ilə heç vaxt danışıqlar aparılmasına razı olmazdıq”.

Xatırladaq ki, ABŞ prezidenti Donald Tramp iyulun 30-da Ağ evdə İtaliyanın baş naziri Cüzeppe Konte ilə danışıqlardan sonra jurnalistlərə açıqlamasında İran məsələsinə toxunmuşdu.

O, jurnalistlərdən birinin ona verdiyi “Siz rəsmi Tehranla yaşanan çaxnaşmanı azaltmaq üçün İran prezidenti Həsən Ruhani ilə görüşə hazırsınızmı” sualını belə cavablandırmışdı: “Mən, heç bir ilkin şərtsiz hər kəslə, o cümlədən də İran rəsmiləri ilə istənilən vaxtda görüşməyə hazıram. Bunun üçün heç bir şərtim yoxdur. Əgər onlar (İran rəhbərləri) istəsələr bir-birimizlə görüşərik. Bu, həm onlar və bizim üçün, həm də dünya üçün yaxşıdır. Lakin güman etmirəm ki, indiki şəraitdə onlar buna hazır olsun”.

A.M