Azərbaycanın şimal və cənubunda yaşayan bacılar 63 il sonra bir-birinə qovuşdu

SON XƏBƏRLƏR

Azərbaycanın şimal və cənubunda yaşayan bacılar 63 il sonra bir-birinə qovuşdu – VİDEO

2021.10.20, 07:36

Gunaz.tv

GünAz TV: Güney Azərbaycanın Meşginşəhr (Xiyav) məntəqəsində yaşayan iki bacı Şimali Azərbaycanda yaşayan bacılarına 63 il sonra qovuşublar.

Bu ayrılığa 1940-cı illərdə, Azərbaycan Milli Hökuməti süquta uğradıqdan sonra zəmin yaranıb. O zaman ki, meşginşəhrli Novruz Bərpuş vətəni tərk edərək Şimali Azərbaycana sığınıb.

Məlumata görə, N.Bərpuş qaçqın düşdükdən sonra bir çoxları kimi Stalinin əmri ilə Sibirə sürgün edilib. Bundan sonra onunla Meşginşəhrin Təbnəq kəndində yaşayan ailəsi, o cümlədən 3 qızı arasında əlaqə təmami ilə kəsilib. Novruz Sibirdə məhkumluq müddəti bitdikdən sonra Şimali Azərbaycanın Gəncə şəhərində məskunlaşıb. O yaşadığı yerdə ailə qurub, iki oğlan və bir qızı olub. Novruz və iki oğlu SSRİ (Şurəvi) dağılmadan öncə vəfat edib, lakin onun Lyudmila adlı qızı ailənin tək uşağı kimi öz həyatını davam etdirib. Azərbaycan Respublikası 1991-ci ildə müstəqilliyini bərpa etdikdən sonra Novruzun nəvələri onu və ailəsini axtarmaq üçün Şimali Azərbaycana gəliblər. Onlar nəhayət babalarının Gəncədəki qəbirini tapıb və sonralar bunun izi ilə Lyudmilanı tapmağa nail olublar.

Məlumata görə, coğrafiya üzrə Moskva Universitetinin məzunu olan Lyudmila fevralın 15-də Güney Azərbaycanın Meşginşəhr şəhərinə səfər edərək 63 illik həsrətə son qoyub. Yaşlı bacılar Təbnəq kəndində bir-birlərini qucaqlayıblar, duyğusal anlar yaşanıb. Lyudmila bildirib ki, o həyatı boyu bacılarını görməyi arzulayıb. Onun bacıları Zivər və Səfiyyə isə 63 ildir doğma ataları və onun ailəsini görmək həsrətində olduqlarını bildiriblər.

Video:

https://www.youtube.com/watch?time_continue=23&v=Imzb8lB04PQ

N.S