GünAz TV: “Sepah” terror təşkilatının “Qüds Qüvvələri”nin komandanı Qasım Süleymaninin həlak olmasından sonra Əli Xamneyi İsmayıl Qaanini bu hərbi birləşmənin yeni başçısı təyin etdi.
Qaaninin təyinatından sonra Əfqan mediasında onun Bamiyan vilayətinə İranın Kabildəki səfirinin müavini adı altında etdiyi səfərlə bağlı fotolar yayılıb. İlk dəfə 2018-ci ilin iyul ayında Bamiyan valiliyinin rəsmi saytında dərc edilmiş həmin şəkillərdə Qaaninin vali Məhəmməd Tahir Züheirlə görüşdüyü görünür.
Valiliyin saytında foto ilə birlikdə yazılmış məlumatda Qaaninin adı çəkilmir. Mətndə qeyd edilir ki, “İranın Əfqanıstandakı səfirinin müavini cənab İsmayıli Bamiyana səfər edib”.
Məhəmməd Tahir Züheir məsələ ilə bağlı KİV-lərə bildirib ki, Qaani o vaxt özünü İran diplomatı kimi təqdim edib və əyalətə İranın yerli rəhbərliyə dəstəyini nümayiş etdirmək üçün gəldiyini deyib. O, həmçinin qeyd edib ki, protokol qaydalarına əsasən, Kabillə razılaşdırılmadan heç bir xarici dövlət rəsmisi bu vilayətə səfər edə bilməz.
Məsələyə münasibət bildirən Əfqanıstanın Xarici İşlər Nazirliyi Qaaninin şiələrin üstünlük təşkil etdiyi Bamiyan vilayətinə nə vaxt və hansı üsullarla səfər etdiyinin araşdırıldığını bəyan edib.
"Biz onun ziyarətinin dəqiq mahiyyətini və tarixini araşdırırıq. Bu arada, sizi əmin edə bilərəm ki, o, heç vaxt İranın Əfqanıstanda akkreditə edilmiş səfirin müavini postunu tutmayıb " - deyə, Əfqanıstanın xarici işlər nazirinin səlahiyyətlərini icra edən İdris Zaman yerli media orqanlarına verdiyi açıqlamada qeyd edib.
Əfqanıstan rəsmiləri İsmayıl Qaanini bu ölkənin rəsmiləri ilə koordinasiya etmədən şiələrin üstünlük təşkil etdiyi Bamiyan vilayətinə getdiyi üçün saxtakarlıqda və məkrli plan icra etməkdə ittiham edirlər.
Qeyd etmək lazımdır ki, İran əsasən Əfqanıstanda fəaliyyət göstərən Taliban terror təşkilatına maddi, hərbi və siyasi dəstək göstərir. Bunu ara-sıra iranlı rəsmilər də dilə gətirirlər.
Ə.A
