Əli Mütəhhəri: "Görünür, ölkənin siyasi sisteminin əməllərində yanlışlıqlar olduğundan, ilahi qəzəbə düçar olmuşuq"

SON XƏBƏRLƏR

Əli Mütəhhəri: "Görünür, ölkənin siyasi sisteminin əməllərində yanlışlıqlar olduğundan, ilahi qəzəbə düçar olmuşuq"

2021.10.20, 07:36

Gunaz.tv

GünAz TV: İran Milli Məclisinin sabiq deputatı Əli Mütəhhəri bildirib ki, görünür, ölkənin siyasi sisteminin əməllərində yanlışlıq mövcud olduğuna görə, İran "ilahi qəzəbə tuş gəlib".

O, bu səbəbdən rejimi rəftarlarını dəyişməyə çağıraraq, belə davam edərsə, ölkənin sonunun xeyirə doğru getmədiyini deyib.

Deputat fevral ayının 21-də keçirilən Parlament seçkilərində seçici aktivliyinin çox aşağı olmasının səbəbinin seçiləcək adamların təyin edilməsində olduğunu deyib. O, insanların buna görə də, seçkilərə ümidini itirdiyini, gələcək seçkilərdə vəziyyətin bundan da bərbad olacağını qeyd edib.

Mütəhhəri mövcud vəziyyətdən çıxış yolu kimi rəsmilərdən seçki prosesinə hörmət göstərməyi və seçiləcək adamları təyin etməməyi istəyib.

"Mənim millət vəkili olduğum son çağırış zamanı Milli Məclisə öz vəzifələrini icra etmək, habelə ölkənin mühüm və böyük problemlərinə qarışmağa icazə vermədilər. Benzinin qiymətinin artırılmasında hər kəs bunun şahidi oldu. Ölkənin 3 Sisteminin Rəhbərlərinin İqtisadi Koordinasiya Şurası yanacağın bahalaşması ilə bağlı qərar qəbul etdi. Onu dəyişmək istəsək də, bizə icazə vermədilər. Daha sonra spikerin qarşı çıxmasına rəğmən, Daxili İşlər nazirinin Parlament qarşısında sorğu-suala çəkilməsini tələb edirdik. Bunun üçün şərait formalaşdırılsa da, sonda bildirdilər ki, yuxarılardan tapşırıq gəlib, bu iş məsləhətə uyğun olmadığına görə, ondan əl çəkin!", - deyə deputat əlavə edib.

Əli Mütəhhəri benzin etirazları zamanı öldürülənlərin sayının Əli Şəmxani tərəfindən onlara elan edildiyini, lakin millət vəkillərinə statistikanı açıqlamağa icazə verilmədiyini də deyib.

O, həmçinin 1398-ci il (21 mart 2019- 20 mart 2020) ərzində baş vermiş daşqın, zəlzələ, noyabr etirazları, Qasım Süleymaninin öldürülməsi və onun dəfn mərasimində çoxlu sayda insanın ölməsi, Ukrayna təyyarəsinin vurulması, eləcə də koronavirus ölkədə yayılması kimi halları rejimin işində problemin olduğu ilə bir daha əlaqələndirərək, bunların həmin əməllərə görə "ilahi qəzəb" olduğunu vurğulayıb.

"Vilayəti-fəqihin əzəməti xalqın ifadə azadlığı və tənqid hüququnun olması fonunda vəli fəqihin rəylərini seçməsidir. Lakin hazırda vilayəti-fəqihin bütə çevrilməsinə doğru gedirik", - deyə Əli Mütəhhəri fikrini tamamlayıb.

Ə.A