GünAz TV: İran rejiminin Güney Azərbaycan türk millətini hədəfə aldığı asimilasyon siyasəti bütün yönləri ilə davam edir.
Son məlumata görə, Ərdəbil Əyalətində yerləşən Parsabadın “Təzə kənd” şəhərinin adının dəyişdirilməsi ilə bağlı qərar qəbul olunub.
İran mediasında yayılan məlumata görə, bu barədə Nazirlər Kabineti, Daxili İşlər Nazirliyinin təklifi əsasında qərar qəbul edib. Yeni qərara görə, şəhərin tarixi adı dəyişdirilərək “Muğansər” adlandırılıb. Təhrif edilmiş adın birinci hissəsi “Muğan” sözündən ibarət olsa da, adın şəkilçisi (“sər”) fars dilinə aiddir. Problem təkcə adın hansı dildə olması ilə də məhdudlaşmır. Şəhərin tarixi adının unutdurulması, kimliyinin fərqli şəkildə təqdim olunması da güdülən məqsədlərdən biridir.
Məlumata görə, artıq Nazirlər Kabinetinin qəbul etdiyi qərar Ərdəbil Valiliyi tərəfindən əyalətin bütün idarələrinə elan olunub.
Qeyd edək ki, İran rejimi Azərbaycan türklərinin mədəniyyəti və milli kimliyini təhrif etmək məqsədi ilə türk dilində təhsil almağa qadağa qoymaqla yanaşı doğulan uşaqlara türk adlarının verilməsinə də maneçilik yaradır. Eləcədə mağaza və şirkətlərə türk adı vermək təxminən qadağandır. Qədim dövrlərdən miras qalan tarixi coğrafi adlar isə rəsmi orqanların qərarı ilə tədricən sıradan çıxarılır. Bu adlar əksər halda fars dilinə tərcümə edilir, halbuki, dünyanın heç yerində coğrafi adlar başqa bir dilə tərcümə edilərək dəyişdirilmir. Bütün bunlar uzun illərdir ki, azərbaycanlıların etirazı ilə qarşılanır, lakin rejim geri addım atmaq niyyətində deyil.
N.S
