GünAzTV: İranın müxtəlif şəhərlərində hakim molla rejiminə və onun zülmünə qarşı dinc etirazlar davam edir.
Yanvarın 31-də Tehran, İsfahan, Sənəndəc, Kirmanşah, Rəşt, Zərrinşəhr və Əhvaz şəhərlərində minlərlə dinc aksiyaçının iştirakı ilə ölkəyə hakim dini rejimə qarşı pərakəndə xalq etirazları keçirilib. “Xamneyiyə ölüm” və “Dikatatora ölüm” və "Ey qeyrətli iranlı, bizə qəşul dəstək ver" şüarları səsləndirən etirazçılar, rejimin ölkə vətəndaşlarına qarşı repressiyalarına son qoyulmasını tələb ediblər. İsfahanda, aksiyaçılar, onların sivil etirazına müdaxilə edən bir polis motosikletinə, Sənəndəcdə isə “Bəsic” təşkilatının qərargahına od vurublar.
Molla rejiminə qarşı pərakəndə xalq etirazları fevralın 1-də Kirmanşah, İsfahan, Zərrinşəhr, Şahrud, Əhvaz, Sənəndəc, Həmədan, Toyserkan, Məşhəd, Dorud, Ərak, Yəzd, Rəşt və Tehranda davam edib. İslam Respublikasının qurucusu axund Ruhullah Xomeyninin ölkəyə gəlişinin 39-cu ildönümünə təsadüf edən etirazlarda, İranın dini lideri Əli Xamneyiyə “Ölüm” şüarları səsləndirilib, onun hakimiyyətdən getməsi tələb edilib. Tehranda isə axşam saatlarında keçirilən etirazlarda, dinc etirazçılar axund Ruhullah Xomeyninin şəhərin müxtəlif küçələrində asılmış poster və bannerlərini cırıb atıblar.
Rəştdə, rejim qüvvələri “Xamneyiyə ölüm”, “Diktatora ölüm” və “Xamneyi! Abır-həyan olsun, utan xəcalət çək, hakimiyyətdən əl çək” şüarları səsləndirən dinc etirazçılara qarşı gözyaşardıcı qazdan istifadə edərək, onları dağıtmağa çalışıblar. İsfahan əyalətinin Zərrinşəhr şəhərində isə dinc etirazçılar “Üç əcnəbi muzdlusuna, Xomeyniyə, Xamneyiyə, Xatəmiyə ölüm olsun” şüarı səsləndirərək rejimin ölkə vətəndaşlarına qarşı zorakılığına etiraz bildiriblər.
Bildirilir ki, fevralın 1-də İranın müxtəlif şəhərlərində keçirilən aksiyalarda onlarla etirazçı polis və təhlükəsizlik qüvvələri tərəfindən tutularaq naməlum istiqamətə aparılıb.
Xatırladaq ki, ay əvvəl İranın 101 şəhərində hakimiyyətə və onun dini lideri, axund Əli Xamneyiyə qarşı kütləvi etirazlar keçirilib. Çökmüş və çürümüş hakim rejimin iflasa uğramış iqtisadi, daxili və xarici siyasətinə, yoxsulluğa və repressiyalara qarşı keçirilən etirazlarda, Xamneyiyə, prezident Həsən Ruhaniyə “Ölüm” şüarları səsləndirilib, onların hakimiyyətdən getməsi tələb olunub. Etirazlarda, ən azı 25 nəfər öldürülüb, onlarla aksiyaçı yaralanıb, 4000 nəfərdən çox insan həbs edilib.
Tutulanlardan isə ən azı 12 nəfəri İranın müxtəlif şəhərlərinin zindanlarında dindirilərkən işgəncələr altında öldürülüb. Hakimiyyət rəsmiləri isə həmin şəxslərin “intihar” etdiyini iddia edirlər.
“Bahalığa yox” şüarı adı altında “Teleqram” sosial şəbəkəsində edilən çağırışa əsasən, dekabrın 28-də Məşhəd şəhərindən başlanan etirazlar, az sonra radikallaşaraq molla rejiminin əleyhinə yönəlib. Hazırda ölkənin iri şəhərlərində elan olunmamış fövqəladə vəziyyət hökm sürdüyünə görə, etirazlar müvəqqəti olaraq dayandırlmışdı.
VİDEOLAR:
Əhvaz 1
Əhvaz 2
Fevralın 1-i Tehran, cırılmış bannerlər
A.M
