GünAzTV: Hindistanın ən böyük hökumət bankı İranla əməkdaşlığını dayandıracaq. Bu barədə, Hindistan Neft Şirkətinin maliyyə məsələləri üzrə direktoru E.K.Şarma iyunun 15-də jurnalistlərə açıqlamasında məlumat verib.
Amerikanın İrana qarşı yeni sanksiyalarının tətbiqinə toxunan Şarma bildirib ki, əgər İrandan alınan neftin pulunun bank vasitəsilə köçürülməsində hər hansı bir problem və ya məhdudiyyət yaranarsa, Hindistan Neft Şirkəti bu ilin avqust ayının sonundan başlayaraq İrandan neft idxalını xeyli dərəcədə azaltmalı olacaq: “Əgər ödəniş edilməsi üçün yeni yollar nəzərə alınmasa, avqust ayından sonra İrandan neft alışı dayandırıla bilər”.
Xatırladaq ki, Amerika prezidenti Donald Tramp mayın 8-də Ağ Evdə çıxış edərək Vaşinqtonun İranla imzalanmış nüvə sazişindən çıxdığını rəsmən elan edib: “İran rejimi terrorizmin əsas himayədarı olaraq qalır. Bu rejim, bölgənin müxtəlif ölkələrinə və terrorçu qruplara raket göndərir, bütün Orta Şərqdə yaşanan çaxnaşma və qarşıdurmaları qızışdırır, od-alov üstünə benzin səpir, “Hizbullah”, “Həmas”, “Taliban” və “Əl-Qaidə” kimi terrorçu qruplaşmalara dəstək verir”.
Amerikanın bu sazişdən çıxmasının ardınca, Vaşinqtonun İrana qarşı sanksiyaları genişləndirilib. Nəticədə, son həftələr dünyanın onlarla beynəlxalq şirkəti İranla əməkdaşlığı dayandırıb.
A.M
