GünAz TV: İran Buşehr Atom Elektrik Stansiyasının 2-ci enerji blokunun tikintisin başladıldığını elan edib.
Noyabrın 10-da keçirilmiş beton tökmə mərasimində İranın Atom Enerji Təşkilatının sədri Əli Əkbər Salehi və Rusiya Dövlət Atom Enerjisi Qurumunun (Rosatom) icraçı direktorunun birinci müavini Aleksandr Lokşin də iştirak ediblər.
İran Atom Enerji Təşkilatının yaydığı məlumata görə, reaktorun tikintisi üçün bünövrə qazma işləri 2017-ci ilin noyabr ayında başlayıb, layihənin 2-ci mərhələsi olan beton tökmə işləri isə müəyyən müddət təxirdən sonra ötən gün start götürüb.
Mərasimdə çıxış edən Salehi Buşehr AES-in 2-ci və 3-cü bloklarının 2025- 2026-cı illərə qədər artıq istismara veriləcəyinə ümid etdiyini deyib. O, həmçinin atom enerjisi üzrə təcrübələrini körfəz ölkələri ilə bölüşməyə hazır olduqlarını bəyan edib.
İranlı rəsmilərin iddialarına əsasən, hər 3 blok birlikdə 3 min maqavat enerji istehsal etmək gücünə sahib olacaq.
Xatırladaq ki, körfəz ölkələri dəfələrlə sözügedən AES-in həssas tektonik zonada yerləşdiyinə görə, onlara qarşı təhdid yaratdığından narahatlıq ifadə ediblər.
Layihənin əsas podratçısı Buşehrin ilk blokunu 12 il təxirdən sonra 2011-ci ildə təhvil verən Rusiyanın "Atomstroyexport" şirkətidir.
Buşehr AES-ə uran Rusiyadan gətirilir və MAGATE bu prosesə nəzarət edir. Buna baxmayaraq, İran bir neçə gün öncə bəyan edib ki, Buşehrin enerjisini təmin etmək üçün uranın zənginləşdirilməsini 4.5%-ə çatdırıb. Bu isə öz növbəsində 2015-ci il nüvə razılaşması ilə ziddiyyət təşkil edir.
Ə.A
