İranda daha 92 nəfərin ölməsi ilə koronavirusdan ölənlərin sayı 4869 nəfərə yüksəlib (Yenilənmiş statistika)

SON XƏBƏRLƏR

İranda daha 92 nəfərin ölməsi ilə koronavirusdan ölənlərin sayı 4869 nəfərə yüksəlib (Yenilənmiş statistika)

2021.10.20, 07:36

Gunaz.tv

GünazTV: İranda son bir gün ərzində daha 92 nəfər koronavirusdan ölüb, 1606 yeni “Covid-19” infeksiyasına yoluxma faktı qeydə alınıb.

Bu barədə, İran Səhiyyə Nazirliyinin sözçüsü Kiyanuş Cahanpur bu gün mediaya açıqlamasında ölkədə koronavirus qurbanlarının yeni statistikasını yayarkən bildirib.

Cahanpur deyib ki, ötən bir sutka ərzində daha 92 nəfərin xəstəlikdən həyatını itirməsi ilə, koronavirusdan ölənlərin ümumi sayı 4869 nəfərə çatıb: “Dünən günorta saatlarından indiyə qədər həmçinin 1606 yeni “Covid-19” infeksiyasına yoluxma faktının qeydə alınması ilə İranda koronavirusa yoluxanların ümumi sayı 77 min 995 nəfərə yüksəlib.

Xoşbəxtlikdən koronavirus xəstəliyindən sağalıb evə buraxılanların sayı da artaraq, 52 min 229 nəfərə çatıb.

Təəssüflər olsun ki, hazırda müxtəlif xəstəxanaların reanimasiya şöbələrində saxlanılan yoluxanlardan 3594 nəfərinin durumu ağırdır” -deyə, İran Səhiyyə Nazirliyinin sözçüsü Kiyanuş Cahanpur mediaya açıqlamasında bəyan edib.

Qeyd edək ki, Kiyanuş Cahanpur ölkədə bu günə qədər koronavirusdan ölənlərin sayının 4869 nəfərə, virusa yoluxanların sayının isə 77995 nəfərə çatdığını bildirsə də, İranın tibb mərkəzlərindəki mənbələr, “Covid-19” pandemiyasından ölənlərin və infeksiyaya yoluxanların sayının ən azı 5 dəfə çox olduğunu bildirirlər.

A.M