GünAz TV: Dünya Bankı bildirir ki, İranın hər bir vətəndaşı kasıblıq həddindən aşağı səviyyədə yaşayan hesab edilməmək üçün günlük 5.5 dollar gəlirə malik olmalıdır, hansı ki, hazırda ölkədə adam başına düşən gəlirlərin ortalamasına əsasən, bu rəqəm 3.2 dollar təşkil edir.
İran Mərkəzi Statistika Komitəsinin yaydığı son hesabata görə, 1397-ci ildə (21 mart 2018- 21 mart 2019) şəhərdə yaşayan ailələrin illik gəlirlərinin orta nisbəti 43 milyon 490 min tümən olub. Kənd yerlərində isə bu rəqəm 23 milyon 311 min tüməndən ibarət olub.
Başqa sözlə desək, 1397-ci ildə dolların məzənnəsininin ortalamasını 11 min tümənlə hesabladıqda, 1397-ci il ərzində şəhərdə yaşayan ailələrin günlük 10.8, kənddə yaşayanların isə 5.8 dollar qazandığı məlum olur.
Bu statistikada hər şəhər ailəsinin sayı orta hesabla 3, kənd ailəsinin üzvlərinin sayı isə 4 nəfər göstərilib.
Belə olduqda, aydır görünür ki, şəhərdə yaşayan ailələrin hər bir üzvü gündəlik orta hesabla 3.2, kənddə yaşayanlar isə 1.7 dollar qazana bilir. Xüsusilə, kəndlilərin gündəlik gəlirləri Dünya Bankının təyin etdiyi kəskin kasıblıq həddindən də aşağı hesab edilir.
Bankın son hesabatına görə, dünya ölkələri üzrə ən kəskin kasıblıq həddindən də aşağı yaşayan insanlar gündəlik qazancları 1.9 dollardan az olan insanlar hesab edilir. Qurum bu statistikanı bir qrup ən kasıb ölkənin milli kasıblıq həddinə əsasən, eləcə də alıcılıq qabiliyyətinin bərabərliyi və bu ölkələrdə zəruri məhsulların qiymətlərini dollarla hesablamaqla, hazırlayıb.
Bu göstəriciyə əsasən, gündəlik gəliri 1.9 dollardan az olan insanlar lazım olan qida, geyim və tibbi ehtiyaclarını ödəyə bilməyən qrupa daxildirlər.
Statistikada İran, Türkiyə, Braziliya və Çin də daxil olmaqla, gəlirləri orta həddən çox olan 60 ölkədə kasıblıq həddini gündəlik 5.5 dollardan aşağı təyin edilib. Beləliklə, kasıblıq həddindən yuxarı səviyyədə yaşamaq üçün hər bir İran vətəndaşı illik 2007 dollardan çox pul qazanmalıdır. Eləcə də, dolların hazırda məzənnəsinin 11 min 500 tümən olduğunu nəzərə alsaq, İranda 3 nəfərlik şəhər ailəsi kasıblıq həddindən aşağı yaşamamaq üçün aylıq 6.3 milyon, illik isə ən azı 76.1 milyon tümən gəlirə sahib olmalıdır.
İran Mərkəzi Statistika komitəsinin məlumatı göstərir ki, İranda şəhər əhalisinin əksəriyyəti Dünya Bankının bu ölkə üzrə təyin etdiyi kasıblıq həddi göstəricisindən aşağı səviyyədə yaşayır. Kənd əhalisi isə sözügedən bankın göstəricilərinə əsasən, təkcə İran üçün deyil, bütün dünya üçün nəzərdə tutulan kasıblıq həddindən belə aşağı səviyyədə yaşayır.
Ə.A
