GünAz TV: İranın yerli media orqanlarının məlumatına görə, mayın 5-də makaron qiymətlərinin bahalaşacağı ilə bağlı yayılan məlumatlardan sonra mağazalarda bu məhsul tapılmaz hala gəlib.
İran Qisa Sənayesi Assosiasiyaları Mərkəzinin rəhbəri Kave Zərgəranın dediklərinə əsasən, makaronun hazırlanması üçün istifadə edilən xammalın bahalaşması səbəbindən, İstehsalçı və İstehlakçı Hüquqlarının Müdafiəsi Təşkilatı bu qida məhsulunun qiymətinin 70% artırılmasına icazə verib.
İstehsalçı və İstehlakçı Hüquqlarının Qorunması Təşkilatının sədri Davud Musəvi isə öz növbəsində qiymət artımının qəti olduğunu və bununla bağlı yekun qərarın mayın 6-da elan ediləcəyini deyib.
Qiymət bahalaşması ilə bağlı xəbərlər yayıldıqdan sonra İran əhalisi makaronu köhnə qiymətlərlə almaq üçün mağazalara axışıb. Nəticədə alış-veriş müəssisələrində mövcud olan makaron tükənib.
Qeyd etmək lazımdır ki, İranda ən çox satılan 700 qramlıq makaronun qiymətinin 70% artımdan sonra 5450 tümənə satışa çıxarılacağı nəzərdə tutulur.
Ə.A
