GünAzTV: İranda, yerli ərəblərin doğma vətəni olan Xuzistan əyalətinin Əhvaz şəhərində rejimin ərəblərə qarşı yürütdüyü irqçilik siyasətinə qarşı keçirilən dinc etirazlarda tutulanların sayı 40 nəfərə çatıb.
İrandakı hüquq müdafiəçilərinin yaydığı xəbərə əsasən, dörd gün əvvəldən başlanan etirazlar, ötən cümə günü də davam edib. Bildirilir ki, martın 30-da minlərlə əhvazlının qatldığı etirazlarda, İran Dövlət Televiziyasında ölkədə ərəb xalqının varlığını və onun milli kimliyini inkar edən verilişin düşünülmüş şəkildə yayılmasına kəskin etiraz bildirilib. Qeyd olunur ki, Əhvazın mərkəzində yerləşən Nadiri küçəsində polis və təhlükəsizlik qüvvələrinin dinc aksiyaçılara qarşı isti silah, dəyənək və gözyaşardıcı qazdan istifadə etməsindən sonra etirazçılarla hökumət qüvvələri arasında qarşıdurma yaranıb. Nəticədə bir neçə aksiyaçı yaralanıb, onlarla nəfər tutularaq naməlum istiqamətə aparılıb. İrandakı ərəb mənbələrinin yaydığı xəbərə əsasən, son üç gündə Əhvazda keçirilən etirazlarda tutulanların sayı 40 nəfəri aşıb.
Məlumatda bildirilir ki, həmin gün, etirazlar Xuzistan əyalətinin Mahşəhr və Kut Abdulla şəhərlərində də davam edib və aksiyaçılardan bir neçəsi polis zorakılığına məruz qalaraq həbs edilib. Əhvazlı mənbələr, tutulanlardan bəzilərinin adları müəyyənləşdirə bilib: Xalid Məhavi, Mahmud Beyt Səyyah, Ayişə Nisi, Xədicə Nisi, Səəd Nəvasiri, Əsəd Nəvasiri və Məhəmməd Cəlil Konun.
Həbs edilənlərin hazırda harada saxlanıldığı barədə hər hansı bir məlumat yayılmayıb.
Xatırladaq ki, martın 23-də İran Dövlət Televiziyasının 2-ci kanalından yayımlanan bir uşaq verilişində, azyaşlı aparıcı İran xəritəsində müxtəlif millətlərin yaşadığı bölgələrin üzərinə, o millətin geyimini geyən gəlinciklər yapışdırıb, lakin Əhvaza gəlincə, yerli ərəblərə məxsus geyimi olan gəlincik yox, başqa bir gəlincikdən istifadə edilib. Bununla da burada hər hansı bir ərəbin olmamasına eyham vurulub. Bu irqçi hərəkət isə, yerli ərəb xalqının kəskin etirazına səbəb olub.
A.M
