İranın Fars əyalətində spirtdən ölənlərin sayı 84 nəfərə çatıb

SON XƏBƏRLƏR

İranın Fars əyalətində spirtdən ölənlərin sayı 84 nəfərə çatıb

2021.10.20, 07:36

Gunaz.tv

GünazTV: İranın Fars əyalətində spirtdən zəhərlənənlərin sayı 667 nəfərə, ölənlərin sayı isə 84 nəfərə çatıb.

Bu barədə, Fars əyalətinin Təcili Tibbi Yardım Mərkəzinin ictimaiyyətlə əlaqələr bölməsinin rəisi Həsən Hemməti aprelin 2-də jurnalistlərə açıqlamasında məlumat verib.

Həsən Hemməti deyib ki, son günlər əyalətdə saxta spirtli içkilərdən zəhərlənən 667 nəfər xəstəxanalara müraciət edib: “Təəssüflər olsun ki, saxta spirtdən zəhərlələnərək Şirazın və əyalətin digər şəhərlərindəki xəstəxanalara müraciət edən həmin xəstələrdən 84-ü ölüb, bəziləri isə görmə qabiliyyətlərini itiriblər. Hazırda 583 nəfər spirtdən zəhərlənmə səbəbi ilə xəstəxanalarda müalicə alırlar” -deyə, Fars əyalətinin Təcili Tibbi Yardım Mərkəzinin ictimaiyyətlə əlaqələr bölməsinin rəisi Həsən Hemməti əlavə edib.

Həmçinin İranın Yəzd şəhərində də spirtdən zəhərlənənlərin sayı artaraq 56 nəfərə yüksəlib.

Bu haqda Yəzdin “Şəhid Səduqi” adına Tibb Elmləri Universiteti rektorunun müavini Mahmud Nuri Şadkam bu gün mediaya açıqlama verib.

O bildirib ki, saxa spirtdən zəhərlənən 56 nəfərdən 7-si artıq həyatını itirib, 3-ü isə görmə qabiliyyətindən məhrum edilib.

Hazırda həmin xəstələrdən bir neçəsinin səhhətinin ağır olduğu bildirilir.

Qeyd edək ki, son həftələr İranın müxtəlif şəhər və əyalətlərində koronavirusdan qorunmaq və onun iztirab və stressindən qurtulmaq üçün spirtli içkilərə üz tutan insanların sayı sürətlə artıb. Nəticədə, minlərlə insan saxta spirtdən zəhərlənərək xəstəxanalaraq düşüb, 350-dən çox insan isə həyatını itirib.

A.M