İranlı deputat: “Çabahar limanının Rusiyanın ixtiyarına verilməsi ilə bağlı yayılan xəbərlər şayiədən başqa bir şey deyil”

SON XƏBƏRLƏR

İranlı deputat: “Çabahar limanının Rusiyanın ixtiyarına verilməsi ilə bağlı yayılan xəbərlər şayiədən başqa bir şey deyil”

2021.10.20, 07:36

Gunaz.tv

GünazTV: İran parlamentinin Zahidan şəhərindən seçilmiş deputatı Əlim Yarməhəmmədi avqustun 18-də jurnalistlərə açıqlamasında İranın Çabahar limanını Rusiyanın ixtiyarına verməsi ilə bağlı yayılan xəbərləri təkzib edib.

Deputat deyib ki, Hindistanın Çabahar limanında sərmayə yatırmaqdan imtina etməsi və həmin limanın Rusiyanın ixtiyarına qoyulması ilə bağlı yayılan xəbərlər şayədir: “Bu, şayədən başqa bir şey deyil və sözsüz ki, İranla Hindistan bu sahədə öz üzərlərinə götürdükləri öhdəliklərə əməl edəcəklər.

İran, Rusiya tərəfinin Çabahar limanındakı iqtisadi fəaliyyətini və həmin istiqamətdən əmtəə daşınmasını müsbət qarşılayır. Çünki bu məsələ iqtisadi baxımından bizə sərf edir və bunun bizə qazancı böyükdür. Lakin bu, yeni investorların əvvəlki investorları əvəz etməsi anlamında deyil” –deyə İran parlamentinin deputatı Əlim Yarməhəmmədi əlavə edib.

İranın Çabahar limanı

Qeyd edək ki, ingilisdilli “The Arab Weekly” saytı avqustun 17-də yaydığı bir məqalədə İranın cənubunda yerləşən Çabahar limanının Rusiyanın ixtiyarına verilməsi barədə Tehranla Moskva arasında müqavilə imzalanmasından xəbər verib. Məqalədə bildirilir ki, İranla Rusiya arasında bağlanan qarşılıqlı müqaviləyə əsasən, İranın Buşehr və Çabahar limanları Rusiyanın ixtiyarına veriləcək və Rusiya həmin limanlarda öz hərbi bazalarını təsis edəcək.

A.M