GünAz TV: Yağan güclü qar və çovğun Şərqi və Qərbi Azərbaycan əyalətlərində problemlərə yol açıb.
Ötən gecə yolların buz bağlaması nəticəsində Urmiyada çoxlu sayda maşın yollarda qalıb. Yalnız bir neçə saat keçdikdən sonra xilasedicilər maşınlarda olan insanları xilas ediblər.
Qızıl Aypara Cəmiyyətinin Urmiya şəhəri üzrə şöbəsinin müdir müavini ötən gecə ərzində qar və çovğun səbəbindən yollarda qalmış ümumilikdə 200-dən çox avtomobili sərnişinləri ilə birlikdə xilas etdiklərini deyib.
O, həmçinin xilasedicilərin dağlıq bölgələrdən keçən magistrallarda qalanlara kömək etdiklərini bildirib.
Qar səbəbindən hazırda əyalətin bir çox bölgələrində yollar buz bağladığından, avtomobillərin hərəkəti iflic vəziyyətə düşüb.
Şərqi Azərbaycanda da qar və çovğunlu hava davam edir. Bu səbəbdən bu gün əyalətin bir çox məktəblərində tətil elan edilib. Əyalət yolları və magistrallarının buz bağladığı deyilir.
Məsulların qarın yaratdığı fəsadları aradan qaldırmaq, eləcə də buz bağlamış yolların açılması üçün heç bir tədbir görməməsi əyalətlər ərazisində gediş-gəlişi iflic vəziyyətə salıb.
Ə.A
