GünAzTV: “Sepah”ın dəniz qüvvələrinin komandanı Əli Fədəvi, aprelin 23-də jurnalistlərə açıqlamasında “Sepah”ın ölkədənkənar fəaliyyətindən və onun üzərinə düşən vəzifədən danışıb.
“Sepah”ın Suriya, İraq, Yəmən, Livan və digər ölkələrdəki missiyasına toxunan Fədəvi bildirib ki, İslam İnqilabı Keşikçiləri Korpusu “Sepah” təkcə İranda fəaliyyət göstərmir, bu qurum həmçinin xarici missiyasını da yerinə yetirir: “Bu qurumun adı “İran İnqilab Keşikçiləri Korpusu” yox, “İslam İnqilabı Keşikçiləri Korpusu”dur. Elə buna görə də, Sepah” və onun fəaliyyəti təkcə İranla məhdudlaşmır. Belə ki, “Sepah”ın vəzifəsi, yalnız bir ölkəni və ya hansısa bir coğrafi məkanı, yaxud konkret bir hakimiyyəti qorumaq deyil və bununla bitmir.
Bu, həmişə belə olub, yəni “Sepah”ın yarandığı ilk gündən bu ənənə davam edib. Bu da ona görədir ki, islam inqilabı yalnız bir coğrafi məkanla məhdudlaşmır. Bu gün, dünyada çoxlarının ürəyi “Sepah”la döyünür və onlar bizdəki islam inqilabının yolunu və şivəsini davam etdirirlər. Başqa bir sözlə desək, “Sepah”, coğrafi məkandan asılı olmayaraq dünyanın hər yerində islam inqilabını qoruyur, onu təbliğ edir.
“Sepah”, yarandığı ilk gündən indiyə qədər İran körfəzində və Oman dənizində fəal rol oynayıb. Ümid edirəm ki, bu qurum və ona tabe qüvvələr, gələcəkdə azad sulara yol taparaq, üzərinə düşən missiyasını daha geniş bir miqyasda yerinə yetirəcək”.
A.M
