"İranın Suriyadakı hərbi gücünün 90 faizini məhv etdik"-İsrail

SON XƏBƏRLƏR

"İranın Suriyadakı hərbi gücünün 90 faizini məhv etdik"-İsrail

2022.10.24, 04:28

Gunaz.tv

Adı açıqlanmayan Təl-Əviv rəsmilərinin sözlərinə görə, İsrail son illər bu ölkədə silah istehsalı ilə bağlı İslam Respublikasının imkanlarının böyük hissəsini məhv etməyə nail olub.

Bu məlumata görə, İsrailin hücumları İranın Suriyada ona yaxın silahlı birləşmələrin yaradılması üçün hərbi bazalar qurmaq səylərini səmərəsiz edib.

“Jerusalem Post” qəzeti mənbələrinə istinad edərək Qasım Süleymaninin Suriyadakı planlarının iflasa uğramasının səbəbi kimi İsrail ordusunun İslam Respublikasının mövqelərinə hücumlarının davam etməsini qeyd edib.

Keçmiş SEPAH Qüds Qüvvələrinin komandiri 2020-ci ilin 3 yanvarında Bağdad hava limanı yaxınlığında Amerikanın hücumu nəticəsində öldürülüb.

Qəzet daha sonra əlavə edir ki, İsrailin hücumları İslam Respublikasının Suriyaya dəniz, hava və quru yollarla silah qaçaqmalçılığına ciddi ziyan vurub.

İsrail təhlükəsizlik rəsmilərinin sözlərinə görə, bu hücumlar nəticəsində Suriya ordusunun silah və sursat istehsal etmək imkanları xeyli məhdudlaşıb.

Buna səbəb İranın və "Hizbullah"ın öz silahlarını istehsal etmək üçün Suriya avadanlıq və zavodlarından istifadə etməsidir.

Sonda “Jerusalem Post” Bəşər Əsədin ölkəsində İslam Respublikası və "Hizbullah"ın fəaliyyətini azaltmaq qərarını açıqlayıb.

İsrail mənbələrinin qiymətləndirməsinə əsaslanaraq, Suriya prezidenti ölkəsinin böyük şəhərlərində və sahilyanı ərazilərdə sabitliyi bərpa etməyə çalışmağı özünə prioritet hesab edib.

Suriyada İsrailə aid edilən sonuncu hücum, təxminən bir aylıq nisbi sükutdan sonra oktyabrın 22-də bu ölkə ordusunun Dəməşq hava limanı yaxınlığında hücumu ilə həyata keçirilib.

Cavidan