Təbrizin millət vəkilindən “Traxtur” tərəfdarlarını qaragüruhçu adlandıran “İdman kanalı”na etiraz...

SON XƏBƏRLƏR

Təbrizin millət vəkilindən “Traxtur” tərəfdarlarını qaragüruhçu adlandıran “İdman kanalı”na etiraz...

2021.10.20, 07:36

Gunaz.tv

GünAz TV: Ötən həftə “İstiqlal”la görüşdən sonra “İdman kanalı”nın radio proqramında aparıcı və verilişin qonağı olan ekspert Güney Azərbaycanın “Traxtur” futbol komandasının tərəfdarlarının davranışını müzakirə ediblər.

Onlar Azərbaycan komandasının tərəfdarlarını düşmənin xeyirinə işləyən qaragüruhçu dəstələr və milli təhlükəsizliyi təhdid altına alan qüvvələr adlandırıb. Verilişdə dünya üzrə məşhur olan komandanın cəzalandırılması da tələb olunub.

Bu hadisə Təbrizin millət vəkili Məhəmməd Hüseyn Fərhənginin kəskin etirazına səbəb olub. O bu barədə İran Teleradio Şirkətinin rəisi Dr. Əli Əsgəriyə etiraz məktubu ünvanlayıb.

“Verişin qonağı “Traxtur” tərəfdarlarının ünvanına yersiz və təhqiramiz ittihamlar səsləndirdi. Lazım gələrsə, bu məsələyə qanun çərçivəsində baxıla bilər. Verilişdə təxminın 100 min azarkeş və milyonlarla televiziya tamaşaçısı düşmənin xeyirinə işləyən qaragüruhçu dəstələr və milli təhlükəsizliyi təhdid altına alan qüvvələr kimi qiymətləndirildi.

Əgər söhbət barmaq sayısında olan müəyyən insanlardan gedirsə, o zaman nə üçün oktyabrın 31-də Tehranda baş verənlər bütün “Perspolis” komandasının tərəfdarlarına şamil edilmədi?! Onlar şəhid ailələrini aşağılamışdır.

Mə üçün Tehran stadionlarında müqəddəslər təhqir olunduğu və keçmiş yaramaz rejimə dəstək verildiyi zaman belə analizlər ortaya çıxmır?!

Öz komandasını dəstəkləyən milyonlarla insanın pislənilməsi etnik zəmində nifaq salmaq və milli birliyə xələl gətirməkdən başqa heçnə deyil.

Futbol idmanı və hətta Tehranın hökumətə bağlı komandalarının Təbriz və Azərbaycana mənəvi borcu var. Azarkeşlər stadionları küsərək tərk etdiyi zaman “Traxtur” tərəfdarlarının aktivlik göstərməsi idman meydanlarını yenidən canlandırdı.”- deyə məktubun bir hissəsində qeyd olunub.

Millət vəkili məktubun sonunda Teleradio Şirkətindən Azərbaycanın hörmətli əhalisi və “Traxtur” tərəfdarlarını aşağılamağa son qoymasını istəyib. O həmçinin vurğulayıb ki, “söhbət qanunu pozan komanda oyunçuları və ya azarkeşlərin müdafiə etməsindən getmir. Əsas məsələ oldur ki, bəzi komandaların hökumətə bağlı olması və Futbol Federasiyasının ayrı-seçkiliyə yol verməsi görünən çaxnaşmalara səbəb olur. Bu səbəblər aradan qalxarsa, problemlər də öz həllini tapar və stadionlarda əxlaqlı davranışa şahid olarıq.”