GünAz TV: Yəmən ordusu paytaxt Sananın şərqində yerləşən Nəhəm cəbhəsində husi yaraqlılarına qarşı əməliyyat həyata keçirib.
Əməliyyat nəticəsində İranın yaraqlılara verdiyi çoxlu sayda silah-sursat aşkarlanaraq müsadirə edilib. Yəmən ordusu həmin hərbi vasitələri yerli və xarici media orqanlarına nümayiş etdirib.
Bundan öncə də dəfələrlə İranın Birləşmiş Millətlər Təşkilatının Yəmənə silah göndərilməsinin qadağan edilməsi xüsusunda qəbul etdiyi qətnaməyə zidd olaraq, husilərə hərbi ləvazimatlar göndərməsi ilə bağlı faktlar aşkarlanıb. Beynəlxalq ictimaiyyət rəsmi Tehranı bölgədə sabitliyi pozan bu kimi addımlarına görə qınasa da, bütün sübutlara rəğmən İran husilərə silah göndərməsini təkzib edir.
Yəmən ordusu bəyanatına əsasən, hələ də İran Əl-Hədidə, Əs-Salif, və Rəs İsa limanları vəsitəsilə husilərə silah və ballistik raketlər göndərməyə davam edir. Bəyanatda həmçinin qeyd edilir ki, bəzi hallarda hərbi ləvazimatlar hissələr şəklində göndərilir, Yəmənə çatdıqdan sonra isə Sana və ya Səədədə iranlı mütəxəssislər tərəfindən quraşdırılır.
Qeyd etmək lazımdır ki, Amerika Birləşmiş Ştatlarının bölgədə mənzillənən hərbi gəmiləri də dəfələrlə İrandan husilərə silah-sursat daşıyan gəmiləri saxlayıb.
Ə.A
