GünazTV: İyulun 14-də BMT-nin ictimai-iqtisadi şurasının iclasına qatılmaq üçün Nyu-Yorka səfər edən İranın xarici işlər naziri Məhəmmədcavad Zərif jurnalistlərə açıqlamasında Amerika vizasından danışıb.
Zərif, öz açıqlamasında ona BMT iclasına qatılmaq üçün dövlət katibi Mayk Pompeonun şəxsi təşəbbüsü ilə Amerika vizası verildiyi barədə yayılan məlumatları təsdiq edib: “Mənə BMT iclasına qatılmaq üçün Amerika vizası Pompeonun razılığı ilə verilib” –deyə İranın xarici işlər naziri Məhəmmədcavad Zərif vurğulayıb.
“Röyters” agentliyinin Amerika hökumətindəki iki mənbəyə istinadən yaydığı məlumatında bildirilir ki, əgər Pompeo Zərifə viza verilməsinə qarşı çıxsaydı, bu Amerika Bİrləşmiş Ştatlarının İrana qarşı təzyiqləri gücləndirmək, onu dünyadan daha təcrid etmək və Vaşinqtonun rəsmi Tehranla bütün diplomatik yolları bağlamaq niyyətində olduğu kimi başa düşülə bilərdi. Məhz bu səbəbə görə də Pompeo Zərifə viza vermək qərarına gəlib” –deyə “Röyters” agentliyi əlavə edib.
Xatırladaq ki, prezident Tramp iyunun 24-də “Sepah”-ın ABŞ-a məxsus pilotsuz uçan aparatı vurmasına cavab olaraq, İrana qarşı yeni sanksiyaların tətbiq edilməsi ilə bağlı fərman imzalayıb. Fərmana əsasən, yeni sanksiyalar Xamneyinin özünə, onun işçilərinə və yaxın ətrafına şamil ediləcək, onlara axan maliyyə vəsaitlərinin qarşısını alacaq. Yeni sanksiyalara həmçinin “Sepah” terror təşkilatının 8 komandanı da tuş gəlib.
Amerika prezidenti Donald Tramp
Həmin vaxt Amerikanın maliyyə naziri Stiven Mnuçin jurnalistlərə açıqlamasında yaxın günlərdə İranın xarici işlər naziri Məhəmmədcavad Zərifə də sanksiya qoyulacağını bildirsə də, “Röyters” agentliyi iyulun 12-də Amerika hökumətindəki mənbələrə istinadən Vaşinqtonun hələlik bu addımdan vaz keçdiyi barədə məlumat yayıb.
Amerikanın maliyyə naziri Stiven Mnuçin
Qeyd edək ki, İrandakı siyasi və iqtisadi ekspertlərin, eləcə də beynəlxalq araşdırma mərkəzlərinin bildirdiyinə görə, Əli Xamneyinin və onun başçılıq etdiyi qurumların dünyanın müxtəlif ölkələrində başqa-başqa adlarla yatırdığı sərmayənin ümumi məbləği 200 milyard dollar civarındadır.
A.M
