İlkin hesabat təyyarənin Rusiya tərəfindən vurulduğunu təsdiqləyir

SON XƏBƏRLƏR

İlkin hesabat təyyarənin Rusiya tərəfindən vurulduğunu təsdiqləyir

2025.02.05, 12:12

Qazaxıstan tərəfinin açıqladığı hesabatın ilkin versiyası gözləntilər çərçivəsində idi. Azərbaycan tərəfinin gözləntiləri və ilkin məlumatları ondan ibarət idi ki, təyyarəmiz Rusiya ərazisində, Qroznı ətrafında vurulub.

Gunaz.tv

GünazTV xəbər verir ki, REAL Partiyasının sədri Natiq Cəfərli AZAL-a məxsus təyyarə qəzasının səbəbləri ilə bağlı dərc edilən ilkin hesabatı şərh edərkən deyib.

"Dost, qardaş Qazaxıstan Dövləti bütün basqılara, Kremlin min oyununa baxmayaraq təyyarımizin Rusiya səmasında vurulduğunu, AZAL-ın uçağına Qroznı üzərində atəş açıldıqdan 8 dəqiqə sonra “kover” əməliyyatının elan edildiyini, qəhrəman pilotlarımızın Rusiya ərazisinə enmək üçün izin istədiyini, buna şərait yaradılmadığını təsdiq etdi. Bu hələ ilkin araşdırmanın nəticəsidir, növbəti mərhələdə başqa detallar da üzə çıxacaq. Artıq Rusiya səmasında kənar müdaxilənin olduğu, yəni HHM-lər tərəfindən Azərbaycan təyyarəsinin vurulduğu heç kimdə şübhə doğurmur. İndi başqa detallar açıqlanmalı, bununla bağlı istintaq davam eləməlidir. Nə üçün Azərbaycan təyyarəsinin Rusiya ərazisində enişinə icazə verilməyib, yaxud imkan yaradılmayıb?

Azərbaycanın ilk gündən Rusiyaya qarşı irəli sürdüyü bütün ittihamlar öz təsdiqini tapır, deməli, rəsmi Bakının səsləndirdiyi tələblər də tam hüquqi və ədalətlidir: Rusiya üzr istəməli, kompensasiya ödəməli, təyyarəmizi vuran caniləri cəzalandırmalıdır!"

Atlas Araşdırmalar Mərkəzinin rəhbəri Elxan Şahinoğlu isə ilkin hesabatı şərh edərkən bildirib ki, AZAL-ın Aktauda qəzaya uğrayan təyyarəsi ilə bağlı təhqiqata dair ilkin hesabatda yazılanlar məlumun elanıdır.

"Təyyarə kənar müdaxilə nəticəsində qəzaya uğrayıb, “quş sürüsü” və “”kislorod balonunun partlaması” təsdiqini tapmayıb. Rusiya saytlarına baxdım, hesabat barədə məlumat yaysalar da, mətnin içərisi barədə detallı yazmayıblar, yenə diqqəti qəzanın baş vermə səbəbindən yayındırmağa çalışırlar. Bunlar hesabatda yazılanları belə fərqli şəkildə izah edirlər. Belə olan halda Rusiyadan kompensasiya və cinayətkarların cəzalandırılmasını gözləməyə dəyməz."

Xatırladaq ki, AZAL-a məxsus Bakı-Qroznı aviareysini həyata keçirən sərnişin təyyarəsi 2024-cü il dekabrın 25-də Qroznıda Rusiya HHM sistemi vasitəsilə vurulub. Enişinə icazə verilmədiyindən Qazaxıstana üz tutan təyyarə Aktau hava limanı yaxınlığında qəzaya uğrayıb. Təyyarənin göyərtəsindəki 67 nəfərdən 38-i həlak olub, 29-u sağ qalıb.

Ş.E

GUNAZ.TV

SON XƏBƏRLƏR