Bayramov Anadolu Agentliyinə Ermənistanla sülh prosesini dəyərləndirib

SON XƏBƏRLƏR

Bayramov Anadolu Agentliyinə Ermənistanla sülh prosesini dəyərləndirib

2025.04.14, 13:33

Azərbaycan xarici işlər naziri Ceyhun Bayramov Belek Turizm Bölgəsindəki NEST Konqres Mərkəzində keçirilən Antalya Diplomatiya Forumunda (ADF) Anadolu Agentliyi müxbirinin suallarını cavablandırıb.

Gunaz.tv

Ceyhun Bayramov bildirib ki, Azərbaycan 2021-ci ildə Ermənistana qarşı düşmənçilik səhifəsinin bağlanmasını təklif edib və bu çağırış bir ilə yaxın cavabsız qalıb.

2022-ci ilin ilk aylarında sülh sazişinin beş əsas prinsipini Ermənistana təqdim etdiklərini deyən Bayramov iki ölkə arasında sülh danışıqlarının həmin ilin oktyabrında başladığını xatırladıb.

Bayramov sülh sazişinin ilk mətn layihəsinin Azərbaycan tərəfindən yazıldığını və Ermənistana təqdim edildiyini, danışıqların təxminən 2,5 il davam etdiyini bildirib.

Danışıqların təxminən 1 ay əvvəl yekunlaşdığını və layihənin mətni ilə bağlı razılıq əldə olunduğunu xatırladan Bayramov sözünə belə davam edib:

"Bu mətni imzalamağa imkan verəcək əlavə məsələlər var. Danışıqlar davam edərkən biz Ermənistanı və prosesdə maraqlı olan digər ölkələri bu məsələlərlə bağlı məlumatlandırmışıq. Həll edilməli olan mühüm amillər var. Bunlardan ən önəmlisi Ermənistan Konstitusiyasında Azərbaycanın ərazi bütövlüyünə qarşı iddiaların yer almasıdır. Bu belə davam etdikcə Ermənistan Konstitusiyasının dəyişdirilməsi mümkün deyil".

Azərbaycanın daha bir şərtinin 1990-cı illərdə Qarabağ probleminin həlli üçün yaradılmış ATƏT-in Minsk Qrupu ilə bağlı olduğunu deyən Bayramov əlavə edib:

"ATƏT-in Minsk Qrupu 30 ildir heç bir nəticə əldə etməyib. Bu gün Qarabağ məsələsi həll olunub. Qarabağ Azərbaycanın bir hissəsidir. Ermənistan da bunu qəbul edir. Belə olan halda Ermənistanın Minsk Qrupunun fəaliyyətini davam etdirmək üçün davamlı səyləri bizdə suallar doğurur. Biz israrla Minsk Qrupunun buraxılmasını tələb edirik və gözləyirik. Bu iki mühüm amil indi Ermənistanın sülh sazişinin imzalanmasını şərtləndirəcək".

Şahin Elxanoğlu

GUNAZ.TV

SON XƏBƏRLƏR