İranın yeni təhlükəsizlik planı- Xaricdəkilər əməkdaşlığa cəlb olunur

SON XƏBƏRLƏR

İranın yeni təhlükəsizlik planı- Xaricdəkilər əməkdaşlığa cəlb olunur

2025.09.10, 14:16

İran hökumətinin bir müddət əvvəl "Xaricdə yaşayan iranlılara dəstək" adlı qanun layihəsini qəbul etməsindən sonra, İranın xarici ölkələrdəki səfirlik və konsulluqlarının əməkdaşlarının mühacir iranlılarla təmas halları artıb.

Gunaz.tv

Bununla bağlı məlumatlı mənbələr məlumat yayıb.

Həmin mənbələrdən bəziləri onların özləri ilə də əlaqə saxlanıldığını, "problemlərinin həlli və İrana gəl-getlərinin təşkili" üçün görüş təklif edildiyini bildiriblər.

Məlumatlara görə, İran məmurları Azərbaycan Respublikasında yaşayan iranlılarla da əlaqə qurub, onların bəzilərini İrana getməyə də razı sala biliblar.

Özünü "milli fəal" kimi qələmə verən həmin şəxslərin cəlb olunmasında xüsusilə Məsud Pezeşkianın azərbacanlı olması faktorundan istifadə olunduğu qeyd olunur.

Həmin "milli fəal"ların arasında uzun illər Azərbaycan Respublikasında yaşayan şəxslər, hətta qaçqın statusu alan və daima Tehran rejiminin hədəfində olan bəzi qurumlarda işləyən şəxslər də var.

İrana gedib qayıdanlardan bəzi şəxslərin bildirdiyinə görə, təhlükəsizlik orqanları onları danışdırır, Azərbaycan Respublikasında yaşayan iranlıların, xüsusən siyasi mühacirlərin siyahısının tutulmasına yardım etmələrini istəyirlər.

"Onlar əsasən Azərbaycan Respublikasında yaşayan iranlıların, xüsusən müxalif düşüncəli şəxslərin sayı və kimliklərinin müəyyənləşdirilməsinə, harada və hansı şərayitdə yaşadıqlarını dəqiqləşdirməyə və əlaqələrinin öyrənilməsinə çalışırlar. Məmurlar məlumatların Azərbaycanda yaşayan iranlıları himayə etmək və problemlərinin həllinə yardım göstərmək üçün topladıqlarını bildirirlər",- məlumatlı mənbələr bildirirlər.

Qeyd edək ki, iyulun sonunda Məsud Pezeşkian hökuməti "Xaricdə yaşayan iranlılara dəstək" adlı qanun layihəsini qəbul edib.

Qanun layihəsinə görə, hökumət altı ay ərzində xaricdə yaşayan bütün iranlıların hərtərəfli məlumat bazasını hazırlamalı və hər il parlamentin Milli Təhlükəsizlik Komissiyasına onların statusu haqqında hesabat təqdim etməlidir.

GünazTV

GUNAZ.TV

SON XƏBƏRLƏR