Pezeşkian yenə paytaxtın köçürülməsindən danışdı

SON XƏBƏRLƏR

Pezeşkian yenə paytaxtın köçürülməsindən danışdı - Başqa yolumuz yoxdur!

2025.11.20, 12:29

İran prezidenti Məsud Pezeşkian bu gün yenidən paytaxtın Tehrandan köçürülməsindən danışıb və bunun zəruri olduğunu bildirib.

Gunaz.tv

Bu haqda İran mediası məlumat yayıb.

"Əgər kifayət qədər büdcəmiz olsaydı, bunu daha əvvəl edə bilərdik. Reallıq budur ki, başqa seçimimiz yoxdur və bu, bir zərurətdir. Bu ərazini daha çox əhali və tikinti ilə yükləyə bilmərik. Şəhəri genişləndirə bilərik, ancaq su problemini həll edə bilmərik",- prezident bildirib.

O, iki həftə bundan əvvəl də oxşar bəyanatla çıxış edib, ancaq bəzi rəsmilər paytaxtın kpçürülməsinin müzakirə mövzusu olmadığını bildiriblər.

Bu qəbildən olan bəyanatlardan biri də Məsud Pezeşkianın dənizçilik sahəsində ümumi inkişaf siyasətlərinin həyata keçirilməsinin əlaqələndirilməsi üzrə nümayədəsi Əli Əbdüləlizadə tərəfindən səsləndirilib.

Əbdüləlizadə, su probleminin həlli üçün körfəzdən paytaxta 1000 kilometr uzunluğunda su kəmərinin çəkilməsini planlaşdırdıqlarını söyləyib və paytaxtın köçürülməsi məsələsinin gündəmdən çıxarıldığını bildirib:

"Paytaxtın köçürülməsi gündəmdən çıxarılıb və qəti qərar paytaxtın su və ətraf mühit problemlərini müasir texnologiyalar və resursların elmi idarə olunması yolu ilə Tehranda həll etməkdir".

Qeyd edək ki, 10 milyondan çox əhalisi olan Tehran və qonşu Əlborz əyaləti İran əhalisinin böyük bir hissəsinin yaşadığı bölgədir. Mütəxəssislərin fikrincə kiçik bir ərazidə bu qədər cəmiyyətin toplaşması, şəhər infrastrukturu və su təchizatının əhalinin sayı ilə uyğunsuzluğu İslam Respublikasının son dərəcə qeyri-davamlı inkişaf modelinin və yarıtmaz idarəçiliyinin nümunəsidir.

GünazTV

GUNAZ.TV

SON XƏBƏRLƏR