Danışıqlar dayanıb; Tehran hələ cavab verməyib

SON XƏBƏRLƏR

Danışıqlar dayanıb; Tehran hələ cavab verməyib

2026.05.10, 13:29

Tehran hələ ABŞ-ın sülh təklifinə cavab verməyib və Donald Tramp İranın cavabının “çox yaxında” bəlli olacağını deyir.

Gunaz.tv

Gunaz TV-nin yaydığı məlumata görə, bölgədə gərginliyin davam etdiyi bir vaxtda ABŞ rəsmiləri İran rejiminin Vaşinqtonun son atəşkəs və razılaşma təklifinə hələ də cavab vermədiyini açıqlayıblar.

ABŞ dövlət katibi Marko Rubio Qətərin baş naziri və xarici işlər naziri Şeyx Məhəmməd bin Əbdülrəhman Al Sani ilə görüşdə bölgədəki hadisələri və İranla aparılan danışıqları müzakirə edib. “Axios” nəşri Trampın xüsusi nümayəndəsi Stiv Vitkoffun da görüşdə iştirak etdiyini yazıb.

ABŞ prezidenti Donald Tramp bildirib ki, İran rəsmiləri razılaşma əldə etmək istəyirlər və Vaşinqton Tehranın cavabını “tezliklə” gözləyir.

Ağ Evin sözçüsü Olivia Vells isə deyib: “Prezident Tramp İranın heç vaxt nüvə silahı əldə etməməsinə əmin olmaq üçün bütün variantları masada saxlayır.”

“Fox News”un məlumatına görə, əgər danışıqlar uğursuz olarsa, ABŞ İranın hərbi imkanlarını zəiflətmək üçün sürətli addımlar ata bilər.

Digər tərəfdən İran rejimi rəsmiləri müharibə vəziyyətinin davam etdiyini bildirirlər. İran silahlı qüvvələrinin sözçüsü Əbülfəzl Şikarçi deyib: “Bizə qarşı addım atan hər bir ölkə silahlı qüvvələrin qəti reaksiyası ilə qarşılaşacaq.”

Son günlər Hörmüz boğazında gərginlik artıb və ABŞ ilə müttəfiqləri bölgədə gəmiçiliyin təhlükəsizliyi üçün yeni planları nəzərdən keçirirlər.

GünAzTV
R.G

GUNAZ.TV

SON XƏBƏRLƏR