ABŞ Prezidenti Donald Trampın Vaşinqtonun "işi hərbi yolla tamamlaya biləcəyi" barədə xəbərdarlığından qısa müddət sonra İran bazar günü səhər saatlarında Küveyt və Bəhreyndə yerləşən ABŞ hərbi obyektlərinə raket və pilotsuz uçuş aparatları (PUA) ilə hücumlar həyata keçirib. Bu, son günlərdə artan qarşıdurmaların davamı olub.

Bundan əvvəl ABŞ ordusu Hörmüz boğazında bir tankerin vurulmasından bir neçə saat sonra İrana yeni zərbələr endirdiyini açıqlamışdı.

ABŞ və İran arasında 14 bənddən ibarət müvəqqəti razılaşma fevralın 28-də başlayan döyüşləri dayandırmaq, Hörmüz boğazını yenidən gəmiçiliyə açmaq və İranın nüvə proqramı kimi əsas məsələlər üzrə danışıqlara başlamaq məqsədi daşıyırdı.

Sülh razılaşması və danışıqlardan sonra qarşıdurma yenidən alovlanıb

Bir həftə əvvəl İsveçrədə ABŞ-ın vitse-prezidenti JD Vens və İran parlamentinin sədri Məhəmməd Baqir Qalibafın rəhbərliyi ilə vasitəçilərin iştirakı ilə danışıqların ilk mərhələsi keçirilib. Bundan sonra Vaşinqton Tehrana qarşı bəzi sanksiyaları ləğv etsə də, tərəflər arasında döyüşlər və qarşılıqlı ittihamlar yenidən başlayaraq daha da şiddətlənib.

"Elə bir məqam gələ bilər ki, artıq təmkin nümayiş etdirmək mümkün olmayacaq və başladığımız işi hərbi yolla tamamlamağa məcbur olacağıq. Əgər bu baş verərsə, İran İslam Respublikası artıq mövcud olmayacaq", – Tramp sosial şəbəkədə yazıb.

Trampın paylaşımından təxminən bir saat sonra Küveyt ordusu hava hücumundan müdafiə sistemlərinin "düşmən" raket və PUA hücumlarına cavab verdiyini bildirib. Bəhreyndə isə Daxili İşlər Nazirliyinin məlumatına görə hava həyəcan siqnalları səsləndirilib.

İran İslam İnqilabı Keşikçiləri Korpusu (SEPAH) dəniz və hava qüvvələrinin Küveyt və Bəhreyndəki ABŞ hərbi obyektlərinə qarşı birgə raket və PUA əməliyyatı keçirdiyini açıqlayıb.

ABŞ rəsmisi hücumları təsdiqləyərək bildirib ki, vəziyyət dəyişkən olaraq qalır, lakin indiyədək ABŞ hərbçiləri arasında itki və ya Yaxın Şərqdəki Amerika obyektlərinə ciddi ziyan barədə məlumat yoxdur.

SEPAH ABŞ-nin atəşkəsi pozduğunu və bütün diplomatik proseslərin tamamilə dayandıralacağını bəyan edib. Bəyanatda həmçinin qeyd olunub ki, bölgədəki ABŞ bazaları "qarşıdakı günlərdə cəhənnəmi yaşayacaq".

ABŞ Mərkəzi Komandanlığının (CENTCOM) daha əvvəl yaydığı məlumata görə isə Panama bayrağı altında üzən bir tankerin şənbə günü İran PUA-sı tərəfindən hücuma məruz qalmasından sonra ABŞ qüvvələri İrana yeni zərbələr endirib.

"İrana atəşkəs razılaşmasına əməl etmək imkanı verilmişdi, lakin o, bunu etməməyi seçdi" - CENTCOM-un açıqlamasında qeyd edilib.

Zərbələrin "İranın kommersiya gəmiçiliyinə qarşı davam edən təcavüzünə birbaşa cavab olaraq" endirildiyi və İranın hərbi müşahidə, rabitə, hava hücumundan müdafiə, PUA anbarları və mina yerləşdirmə obyektlərinin hədəfə alındığı qeyd olunub.

İran dövlət televiziyası IRIB ölkənin cənubundakı Sirik şəhərində partlayış səslərinin eşidildiyini bildirib, lakin əlavə məlumat verməyib.

- Cəfər Cəfərli