Çikaqoda Xocalı faciəsi qurbanlarının xatirəsi anılıb +video

SON XƏBƏRLƏR

Çikaqoda Xocalı faciəsi qurbanlarının xatirəsi anılıb +video

2021.10.20, 07:36

Gunaz.tv

GünAz TV: Amerika Birləşmiş Ştatları (ABŞ) Çikaqo şəhərinin North Eastern universitetində Xocalı faciəsinin 27-ci ildönümünə həsr olunmuş tədbir keçirilib.

“Müharibə uşaqları” adı ilə keçirilən tədbir İllinoys Ştatının “Azərbaycanlılar Cəmiyyəti” tərəfindən təşkil olunub, mərasimdə Amerikada yaşayan bir çox azərbaycanlı iştirak edib.

Azərbaycanın ABŞ-dakı səfirliyinin nümayəndəsi tədbirdə çıxış edərək 27 il bundan öncə törədilmiş Xocalı qətliamının Ermənistanın Azərbaycana qarşı təcavüzünün ən faciəvi səhifəsi olduğunu deyib. O vurğulayıb ki, Xocalı ilə bağlı ədalətin gərçəkləşməsi üçün bütün azərbaycanlılar birlik nümayiş etdirməlidir.

Türkiyənin Çikaqo şəhərindəki baş konsulu Umut Acar isə Xocalı faciəsi və erməni terrorçuları tərəfindən Türkiyə diplomatlarına qarşı törədilən cinayətlər barədə məlumat verib, bu həqiqətlərin dünya ictimaiyyətinə çatdırılması üçün belə tədbirlərin vacibliyini vurğulayıb. Bundan əlavə, o, Türkiyə-Azərbaycan qardaşlıq münasibətləri barədə də ətraflı məlumat verib.

Bundan sonra Prof. Hani Lepinski, xanım Ami Baldwin və İraq türkmənlərindən olan bir ictimai-siyasi fəal mövzu ilə bağlı çıxış ediblər.

Azərbaycanlı rejissor Dr. Şamil Nəcəfzadə isə Xocalı barəsində olan sənədli filmi barədə tədbir iştirakçılarına məlumat verib. Bundan sonra “Müharibə uşaqları” adlı sənədli film nümayiş olunub.

Mərasimdə Güney Azərbaycan televiziyasının (GünAz TV) qurucusu və müdiri olan Əhməd Obalı da mövzu ilə bağlı qısaca çıxış edib. Bütün qonaqları salamlayan Ə.Obalı bu önəmli tədbirə qatılan siyasi şəxsiyyətlər və digər qonaqlara öz təşəkkürünü bildirib.

Xatırladaq ki, 1992-ci il fevralın 26-da Ermənistan hərbi birləşmələri 7 min əhalisi olan Xocalı şəhərində soyqırım aktı həyata keçirdi. Xocalı soyqırımı zamanı 613 nəfər öldürüldü, 1000 nəfər müxtəlif yaşlı dinc sakin aldığı güllə yarasından əlil oldu. 106 nəfər qadın, 63 azyaşlı uşaq, 70 qoca qətlə yetirildi. 8 ailə tamamilə məhv edildi, 25 uşaq hər iki valideynini, 130 uşaq isə valideynlərindən birini itirdi. Faciə baş verən gecə 1275 nəfər dinc sakin əsir götürüldü, onlardan 150 nəfərin taleyi indi də məlum deyil.

N.S

GUNAZ.TV

SON XƏBƏRLƏR