“Naxçıvana heyran qalmamaq mümkün deyil” - Əməkdar artist qədim diyarda konsert verib

SON XƏBƏRLƏR

“Naxçıvana heyran qalmamaq mümkün deyil” - Əməkdar artist qədim diyarda konsert verib

2023.06.03, 20:30

Akademik Opera və Balet Teatrının solisti, Əməkdar artist Elnur Zeynalov bu günlərdə Naxçıvan Muxtar Respublikasına səfər edib. Bu barədə məlumat verən Əməkdar artist bildirib ki, səfər proqramı çox zəngin olub.

Gunaz.tv

Son illər Azərbaycan Dövlət Pedaqoji Universitetinin Beynəlxalq əlaqələr üzrə prorektoru, filologiya elmləri doktoru, professor Mahirə Nağıqızı ilə maraqlı işbirliyi olduğunu söyləyən Elnur Zeynalov bu səfərə də onun rəhbərlik etdiyi nümayəndə heyətinin tərkibində gedib.

Naxçıvan Dövlət Universitetinin rektoru Elbrus İsayevin dəvəti ilə reallaşan bu səfər zamanı çox maraqlı, unudulmaz tədbirlər olub. Naxçıvan Dövlət Universitetində professor Mahirə Nağıqızı ilə tələbə və müəllim heyətinin görüşü keçirilib.

"Bu ali təhsil ocağında Mahirə Nağıqızının sözlərinə yazılmış mahnılardan ibarət konsert də təşkil olundu, bəstələdiyim və ifa etdiyim həmin mahnıları tamaşaçılar alqışlarla qarşıladılar.

Həmçinin Cəlil Məmmədquluzadə adına Naxçıvan Dövlət Musiqili Dram Teatrının binasında “Naxçıvan” Universitetinin rektoru Anar Kazımovun təşkilatçılığı ilə “Heydər Əliyev və milli dövlətçilik məsələləri” mövzusunda keçirilən respublika konfransının bədii hissəsində də səhnəyə dəvət olunaraq Mahirə xanımın sözlərinə bəstələdiyim iki mahnını ifa etdim”.

Elnur Zeynalov Naxçıvanın tarixi yerlərini, mənzərəli təbiətini də seyr etmək imkanı qazandığından məmnun olduğunu bildirir: “Azərbaycanımızın bütün bölgələrində olmuşam, amma Naxçıvana yolum heç düşməmişdi.

Qismət oldu. Naxçıvan şəhərində, Ordubad rayonunda olan tarixi məkanları ziyarət etdim, Batabatın gözəlliyini gördüm. Hər yerdə gülər üzlə, qonaqpərvərliklə qarşılandım.

Qədim Naxçıvanımızın insanlarına və füsunkar təbiətinə heyran qalmamaq mümkün deyil.

Fürsətdən istifadə edib səfərimizi yüksək səviyyədə təşkil etdiyinə görə professor Mahirə Nağıqızına, rektor Elbrus İsayev başda olmaqla Naxçıvan Dövlət Universitetinin kollektivinə, "Naxçıvan" Universitetinin rektoru Anar Kazımova, Muxtar Respublikanın bütün sakinlərinə minnətdarlığımı bildirirəm”.

Ayxan