İranda qadınlara qarşı şiddət halları 22% artıb- Rəsmi statistika

İranda qadınlara qarşı şiddət halları 22% artıb- Rəsmi statistika

GünAz TV: İranın Rifah Təşkilatının tərkibində fəaliyyət göstərən İctimai Təcili Tibbi Yardım Xidməti 1397-ci ildə (2018 mart- 2019 mart-red.) qadınlara qarşı şiddətlə bağlı aldıqları çağırışların ötən illərə nisbətən 20- 22% nisbətində artdığı barədə məlumat yayıb.

 

Xidmətin rəisi Rza Cəfəri məsələ ilə əlaqəli qeyd edib ki, bu rəqəm qadınlara qarşı şiddət hallarının artdığını göstərmir, bu, daha öncə də mövcud idi, lakin bununla bağlı qadınlar daha öncələr heç bir instansiyaya müraciət etmirdilər. Onun sözlərinə görə, rəhbərlik etdiyi qurumun bölgələrdə mərkəzlərinin çoxalması qadınlara qarşı şiddət halları ilə bağlı onlara daxil olan müraciətlərin də artmasına rəvac verib.

 

“Qadınlara qarşı şiddət göstərən əksər şəxslər zərərli vərdişləri olan, ailə həyatı və problemləri barədə məlumatsız və psixoloji problemlər yaşayan kişilərdir”, - deyə  Cəfəri əlavə edib.

 

O, bütün bu halları nəzərə alaraq, Milli Məclisin zorakılıq qarşısında qadınların təhlükəsizliyinin təmin edilməsilə bağlı qanun layihəsi qəbul etməsini zəruri sayıb.

 

Qeyd etmək lazımdır ki, Rza Cəfəri 1396-cı ildə (2017 mart- 2018 mart-red) etidiyi çıxışda həmin ilin ilk 6 ayı ərzində Xidmətin mərkəzlərinə qadın döyülməsilə bağlı 14599 müraciətin daxil olduğunu bildirmişdi.

 

İran Məhkəmə-Tibbi Ekspertiza və Patoloji Anatomiya Birliyinin cari ildə xanımlara qarşı şiddətlə bağlı yaydığı statistikaya əsasən, bu xüsusda Tehran əyaləti 17083 halla ilk pillədə, Rəzəvi Xorasanı və İsfahan əyalətləri müvafiq olaraq 7385 və 6483 halla növbəti 2-ci, 3-cü pillələrdə qərarlaşıblar.

 

Sözügedən 3 əyalət 1393-cü ildə də (2014 mart- 2015 mart-red.) xanımlarına qarşı göstərdikləri şiddətə görə ölkə üzrə ilk 3-lükdə yer almışdılar.

 

Birliyin yaydığı statistika göstərir ki, İranda qadınların döyülməsi ilə bağlı Təcili Tibbi Yardım və Məhkəmə-Tibbi Ekspertiza və Patoloji Anatomiya Birliyinə edilən müraciət avtoqəzalar və küçə davalarından sonra 3 yerdə gəlir. Beləliklə, demək olar ki, hər gün Birliyə 52 qadın döyülməsi faktı ilə əlaqəli müraciət daxil olur.

 

Ə.A


HƏMÇİNİN OXUYUN

HƏMÇİNİN OXUYUN