Ağ evin sözçüsü: “Tramp ABŞ Konqresinin İrana qarşı sanksiyalarla bağlı qəbul etdiyi qanun layihəsini imzalayacaq”

Ağ evin sözçüsü: “Tramp ABŞ Konqresinin İrana qarşı sanksiyalarla bağlı qəbul etdiyi qanun layihəsini imzalayacaq”

GünAzTV: Ağ Evin sözçüsü Sara Hakabi Sanders iyulun 28-də jurnalistlərə açıqlamasında ABŞ Konqresinin İran, Rusiya və Şimali Koreyaya qarşı yeni sanksiyaların tətbiqi ilə bağlı bir gün əvvəl qəbul etdiyi qanun layihəsini imzalayacağından xəbər verib.

 

Sara Hakabi Sanders bildirib ki, ABŞ prezidenti Donald Tramp, Konqresin həmin üç ölkəyə qarşı yeni sanksiyalar tətbiq olunması ilə bağlı qəbul etdiyi qanun layihəsinin mətnini oxuyub, onunla tanış olub: “O, bəzi rəsmilərlə bu barədə müzakirələr və fikir mübadiləsi də aparıb. Prezident Tramp, mövzu ilə bağlı apardığı müzakirələrə əsasən, bu qanun layihəsini imzalamaq qərarına gəlib və sənədi mütləq imzalayacaq”.

 

ABŞ Senatı iyulun 27-də Nümayəndələr Palatasının iki gün əvvəl İran, Rusiya və Şimali Koreyaya qarşı yeni sanksiyalar tətbiq edilməsini nəzərdə tutan qanun layihəsini qəbul edib.

 

Keçirilən səsvermədə 98 senator yeni sanksiyaların tətbiq olunmasının lehinə, 2 nəfər isə əleyhinə səs verib. Bununla da ABŞ Senatı Nümayəndələr Palatasının irəli sürdüyü bu qanun layihəsini səs çoxluğu ilə qəbul edib.

 

Qeyd edək ki, Tehrana qarşı yeni sanksiyalar, İranın ballistik raketlərini inkişaf etdirməsinə, beynəlxalq terrorizmə dəstəyinə, insan hüquqlarını kobud şəkildə pozmasına və region ölkələrində ekstremist silahlı qruplaşmalara yardımına görə tətbiq edilir.

 

 

Xatırladaq ki, ABŞ Konqresinin Nümayəndələr Palatası iyulun 25-də “İranın sabitliyə qarşı yönələn  əməllərinin qarşısını almaq” adlı qanun layihəsinə düzəlişlər edərək onu səs çoxluğu ilə qəbul edib. Keçirilən səsvermədə, 419 nəfər qanun layihəsinin lehinə, 3 nəfər isə əleyhinə səs verib. Sənəd, imzalanması üçün ABŞ prezidentinə göndəriləcək və Donald Tramp tərəfindən imzalanacağı təqdirdə qüvvəyə minəcək.

 

A.M

 


HƏMÇİNİN OXUYUN

HƏMÇİNİN OXUYUN