Amerikadan dənizçilərə xəbərdarlıq: “Sepah”la əlaqədə olan gəmilərlə əməkdaşlıq etsəniz Amerika vizasından məhrum ediləcəksiniz”

Amerikadan dənizçilərə xəbərdarlıq: “Sepah”la əlaqədə olan gəmilərlə əməkdaşlıq etsəniz Amerika vizasından məhrum ediləcəksiniz”

GünazTV: Amerikanın Dövlət Departamenti avqustun 15-də bəyanat yayaraq, “Sepah”la əlaqədə olan gəmilərlə əməkdaşlıq edən dənizçilərə xəbərdarlıq edib.

 

ABŞ Dövlət Departamentinin xəbərdarlığı, Cəbəlüttariq hökumətinin ay yarıma yaxındır saxladığı İrana məxsus “Grace 1” neft tankerini azad etməsindən bir neçə saat sonraya təsadüf edib.

 

Nazirliyin “Twitter” səhifəsində yayılan bəyanatda bildirilir ki, İranın neft tankeri “Sepah” terror təşkilatının Suriyadakı qüvvələrinə yardım etmək məqsədilə bu ölkəyə gedirmiş: “ABŞ Dövlət Departamentinin gəldiyi qənaətə görə, İran rejimi bu tanker vasitəsilə öz neftini Suriyaya daşımaqla bu ölkədəki “Sepah” qüvvələrinə yardım etmək niyyətində olub.

 

Hesab edirik ki, belə bir addım “Grace 1”lə əlaqədə olan bütün şəxslərə ciddi problemlər yarada bilər. Bildiririk ki, Sepah”la əlaqəli gəmilərlə əməkdaşlıq edən dənizçilər Amerika vizasından məhrum ediləcək və bu kimi şəxslərə Amerika vizası verilməyəcək”.

 

İranın 40 gündən çoxdur Cəbəlüttariqdə saxlanılan “Grace 1” adlı neft tankeri avqustun 15-də azad edilib. Cəbəlüttariq məhkəməsi rəsmi Vaşinqtonun tankerin saxlanılmasına təkidinə baxmayaraq, “Grace 1”in azad edilməsi lehinə qərar verib. Bildirilir ki, İran tərəfi neft tankerinin Suriyaya doğru istiqamət götürməyəcəyi barədə üzərinə öhdəlik götürüb və məhz həmin öhdəlikdən sonra tankerin azad edilməsinə qərar verilib.

 

Xatırladaq ki, iyulun 3-də Böyük Britaniyanın Hərbi Dəniz Qüvvələri və Cəbəllüttariq rəsmiləri İranın qanunsuz olaraq Suriyaya neft daşıyan “Grace 1” adlı gəmisini saxladıqları barədə məlumat yayıblar.

 

 

İyulun 19-da isə “Sepah” terror təşkilatının körfəzdəki sürət qayıqları cavab olaraq, Hörmüz boğazında üzən  Britanıyaya məxsus “Stena İmpero” adlı tankeri saxlayıblar. “Sepah”, Britaniya tankerini beynəlxalq dənizçilik qanunlarını pozduğuna görə saxladığını bəyan edib.

 

A.M


HƏMÇİNİN OXUYUN

HƏMÇİNİN OXUYUN