Benyamin Netanyahu: “Biz, bir-birimizin yanında olmaqla İran təcavüzünün qarşısını ala bilərik”

Benyamin Netanyahu: “Biz, bir-birimizin yanında olmaqla İran təcavüzünün qarşısını ala bilərik”

GünAzTV: İsrailin baş naziri Benyamin Netanyahu mayın 22-də bu ölkəyə səfər edən ABŞ prezidenti Donald Trampla birgə qatıldığı mətbuat konfransında jurnalistlərin suallarını cavablandıraraq Amerikanın İranla bağlı siyasətinin dəyişməsindən və İran təhlükəsindən danışıb.

 

Amerikanın yeni hökumətinin İrana qarşı siyasətini sərtləşdirməsindən məmnunluğunu bildirən Netanyahu, üzünü ABŞ prezidentinə tutaraq onu İranın nüvə ambisiyalarına qarşı birgə mübarizəyə çağırıb: “Mən istəyirəm bunu biləsiniz ki, sizin də bir saat əvvəl söylədiyiniz kimi, biz Amerikanın İranla bağlı siyasətini dəyişməsindən necə də məmnunuq və bunu yüksək qiymətləndiririk. Düşünürəm ki, biz, bir-birimizin yanında olmaqla İranın regionda gündən-günə artan təcavüzkar siyasətinin, eləcə də İran terrorizminin  qarşısını birlikdə ala, onu geri çəkilməyə vadar edə bilərik. Belə olarsa, biz həm də İranın bölgədə bir nüvə gücünə çevrilməsi ilə bağlı sonsuz ambisiyalarının qarşısını ala bilərik”.

 

Xatırladaq ki, mayın 22-də Tel-Əvivə səfər edən ABŞ prezident Donald Tramp, İsrailin baş naziri Benyamin Netanyahu ilə görüşdən sonra jurnalistlərə açıqlamasında İranın region ölkələrinə qarşı təhdidindən və nüvə sazişindən danışıb: “İran, İŞİD-lə yanaşı, bölgənin sülh və sabitliyinə qarşı ciddi bir təhdiddir. Bölgənin hər yerində İranın ayaq izlərini görmək mümkündür. İran bölgədə münaqişə baş verən yerlərə pul və silah, eləcə də öz hərbçilərini göndərməklə məntəqəyə müdaxilə edir.  Məhz buna görə də İranın nüvə silahına yiyələnməsinin qarşısı alınmalıdır. Nüvə sazişinə gəldikdə isə hesab edirəm ki, bu razılaşma ən pis və ən dəhşətli bir sazişdir. Bu saziş, İranı  çökməkdən qurtaran bir ipə çevrilib. Amerika bu sazişi qəbul etməməli, ona qol çəkməməli idi”.

 A.M

 

 


HƏMÇİNİN OXUYUN

HƏMÇİNİN OXUYUN