Əli Əkbər Vilayəti: “İranın hərbi mərkəzlərinə baxış keçirməyə heç kimin ixtiyarı yoxdur”

Əli Əkbər Vilayəti: “İranın hərbi mərkəzlərinə baxış keçirməyə heç kimin ixtiyarı yoxdur”

GünAzTV: İranın dini liderinin beynəlxalq məsələlər üzrə müşaviri Əli Əkbər Vilayəti, sentyabrın 6-da jurnalistlərə açıqlamasında Beynəlxalq Atom Enerjisi Agentliyinin İranın hərbi mərkəzlərinə baxış keçirməsi tələbindən, Amerikanın bu haqdakı rolundan və İraq Kürdistanının qarşıdan gələn müstəqillik referendumundan danışıb.

 

ABŞ-ın BMT-dəki daimi nümayəndəsi Nikki Haleyin avqustun 25-də jurnalistlərə açıqlamasında Beynəlxalq Atom Enerjisi Agentliyi müfəttişlərinin İranın hərbi mərkəzlərinə baxış keçirməsinin vacibliyi haqda səsləndirdiyi fikirlərə toxunan Vilayəti deyib ki, agentlik Amerikanın təsiri altına düşməkdən çəkinməlidir: “Nikki Haleyin səsləndirdiyi bu fikirlər yeni bir söz deyil. Bunun bizə heç bir əhəmmiyyəti də yoxdur. Amerikalılar bu işləri ilə nüvə sazişini (“Bərcam”ı) ayaq altına atmağa çalışırlar. Lakin dünya onların bu istəyi qarşısında dayanıb.

 

İranın hərbi mərkəzləri bizim milli təhlükəsizliyimizlə bağlı olan bir məsələdir və heç kəsin onlara baxış keçirməyə ixtiyarı yoxdur və buna imkan da verilməyəcək. İstər Yukio Amano olsun, istər başqası. Biz buna icazə verməyəcəyik. Yukio Amanoya da tövsiyyə edirik ki, keçmişdən dərs alsın və Amerikanın təsir dairəsinə düşməsin. Çünki, İran İslam Respublikasına qarşı heç bir iş görmək olmaz. Bu mümkün deyil".

 

Vilayəti, öz açıqlamasında sentyabrın 25-də İraq Kürdistanında keçirilməsi planlaşdırılan müstəqillik referendumuna da toxunub. O bildirib ki, İran İslam Respublikası İraqın ərazi bütövlüyünün tərəfdarıdır və bu ölkənin parçalanmasına qarşı çıxır: “İraq hökuməti və onunla strateji əlaqələri olan İran belə bir referendumun keçirilməsi ilə müxalifdir. Çünki bu referendumun keçirilməsi, İraqın parçalanmasının başlanğıcı sayıla bilər. Biz isə İraqın ərazi bütövlüyünün qorunub saxlanılmasının tərəfdarıyıq və hesab edirik ki, buna yol verilməməlidir”.

 

A.M


HƏMÇİNİN OXUYUN

HƏMÇİNİN OXUYUN