Emmanuel Makron: “İranın raket proqramına qarşı sanksiyaların tətbiq edilməsi ehtimalı güclüdür”

Emmanuel Makron: “İranın raket proqramına qarşı sanksiyaların tətbiq edilməsi ehtimalı güclüdür”

GunAzTV: Noyabrın 9-da Orta Şərqə səfər edən Fransa prezidenti Emmanuel Makron Səudiyyə Ərəbistanına səfərindən əvvəl Dubayda jurnalistlərə verdiyi açıqlamasından Tehranla Ər-Riyad arasında yaşanan çaxnaşmadan və İranın region ölkələrini təhdid edən raket proqramından danışıb.

 

Tehranla Ər-Riyad arasındakı mövcud ixtilafların aradan qaldırılması üçün iki ölkə arasında danışıqlar aparılmasının vacibliyinə toxunan Makron deyib ki, şiə-husilərin bir neçə gün əvvəl Ər-Riyadın hava limanına atdığı raket İranda istehsal edilib: “Bu açıq-aşkar bir İran raketi idi. İranla bağlı nigaranlığa səbəb olan ciddi əsaslar var. Hesab edirəm ki, biz İranın nüvə proqramı barədə danışıqlar apardığımız kimi, bu ölkənin raket proqramı haqda da müzakirələr aparmalı, zərurət göründüyü təqdirdə bu ölkənin raket proqramına qarşı sanksiyaların tətbiq olunması məsələsini götür-qoy etməliyik. Düşünürəm ki, belə bir sanksiyaların tətbiq olunması ehtimalı çox güclüdür.

 

İran, regional bir gücdür. İranla münasibətlərdə sadəlövhlüyə yol vermək olmaz. Bizim siyasətimiz, bölgədə müttəfiqlərimizə, o cümlədən də Birləşmiş Ərəb Əmirliklərinə dəstək verməkdir. Lakin bu dəstək, regionun müvazinətinə xələl gətirməməli, çaxnaşmaya səbəb olmamalıdır. Aydın məsələdir ki, Mən Səudiyyə Ərəbistanının vəliəhdi Məhəmməd Bin Salmanla görüşümdə bu məsələ və bölgədə yaşanan mövcud böhranla bağlı danışıqlar aparacağam”.

 

 

Xatırladaq ki, İranın dəstəklədiyi şiə-husilərin noyabrın 4-də Ər-Riyadın beynəlxalq hava limanına atdığı ballistik raket, yerə düşməzdən əvvəl Səudiyyə Ərəbistanının hava qüvvələri tərəfindən səmada məhv edilib.

 

Hadisədən az sonra Səudiyyə Ərəbistanının bir sıra yüksək rütbəli rəsmiləri, o cümlədən də xarici işlər naziri Adil əl Cübeyr, vəliəhd və müdafiə naziri Məhəmməd Bin Salman və Ər-Riyadın başçılıq etdiyi ərəb koalisiyasının sözçüsü Torki əl Maliki İrana qarşı ayrı-ayrılıqda bəyanatlar səsləndiriblər. Onlar, İranı Yəməndəki şiə-husiləri ballistik raketlərlə silahlandırmaqda, Səudiyyə Krallığına qarşı hərbi təcavüzdə və bununla da Səudiyyə Ərəbistanına qarşı savaş elan etməkdə günahlandırıblar.

 

A.M


HƏMÇİNİN OXUYUN

HƏMÇİNİN OXUYUN