General Qadi Eizenkot: “İranın regionda ikinci bir Şimali Koreya çevrilməsinin qarşısı alınmalıdır”

General Qadi Eizenkot: “İranın regionda ikinci bir Şimali Koreya çevrilməsinin qarşısı alınmalıdır”

GünAzTV: İsrail ordusunun baş qərargah rəisi Qadi Eizenkot iyunun 20-də “Herzliya” siyasi və təhlükəsizlik toplantısında çıxış edərək İranın bölgədə terrorçu və radikal qruplaşmalara dəstəyindən və onun region ölkələrinə qarşı təhdidindən danışıb.

 

General Eizenkot bildirib ki, İsrasilin birinci prioritet məsələsi, bölgədə sülh və sabitliyin bərqərar olunmasıdır: “İranda keçirilən son prezident seçkiləri bir daha göstərdi ki, iranlılar ölkədəki mövcud vəziyyətin dəyişməsini istəyirlər. Lakin buna baxmayaraq, “Sepah” komandirləri  regionda öz hədəflərini irəli aparmağa, İsraili təhrik etməyə çalışırlar. Hazırda İran özünü regional bir güc kimi gördüyündən bölgədəki terrorçu qruplaşmalara yardım edir. Bu istiqamətdə, “Hizbullah” ildə 800 milyon dollar İrandan pul alır. İranın Suriyada və Qəzzə zolağındakı nüfuzu, “Həmas” və Fələstin islam cəhadı vasitəsilə gücləndirilir.

 

İranın hərbi sənayesinin gücləndirilməsinin qarşısını almaq, bölgədə hamının təhlükəsizliklə bağlı hədəflərindən biri sayılır. Hesab edirəm ki, dünya birliyi bu istiqamətdə hərəkət etməli, İranın regionda ikinci bir Şimali Koreya çevrilməsinin qarşısı alınmalıdır. Son günlər isə İranın Suriyaya raket zərbələri endirməsinin müəyyən bir mənası və mesajı var. Baxmayaraq ki, İranın atdığı raketlərin çoxu əvvəlcədən nəzərdə tutulan hədəflərə dəyməyib.

 

 

İranın daha inkişaf etmiş raketlər istehsal etməyə cəhdi, rəsmi Tehranın ambisiyalarının bir hissəsidir. Məqsəd isə bu ölkənin bölgədə hegemonluğunu yaratmaq və təmin etməkdir. Bu isə yolverilməzdir. Bizim isə İrana bir mesajımız var. O da budur ki, bu ölkə İsraili təhdid etməməli, bu işindən əl çəkməlidir”.

 

Xatırladaq ki, bir neçə gün əvvəl, “Sepah” Suriyada İŞİD-ə bağlı “təkfirçi terroristlər”in hərbi bazalarına raket zərbələri endirib. “Sepah” bildirib ki, o, iyunun 7-də İŞİD-çilərin ölkə parlamentinə və Xomeyni məqbərəsinə silahlı hücumuna cavab olaraq onların Suriyadakı mövqelərini raket atəşinə tutub. Bildirilir ki, raketlər, “Sepah”ın  Kürdistan və Kirmanşah əyalətlərindəki hava-kosmik hərbi bazalarından atılaraq Suriyanın “Deyr əl-Zur” əyalətində təkfirçi terroristlərin mövqelərini məhv edib.

 

A.M


HƏMÇİNİN OXUYUN

HƏMÇİNİN OXUYUN