İran rəsmisi: “Kirmanşah əyalətində terrorçularla əlaqədə olan 50 nəfər tutulub”

İran rəsmisi: “Kirmanşah əyalətində terrorçularla əlaqədə olan 50 nəfər tutulub”

GünAzTV: İranın Kirmanşah əyalətinin inqilab prokuroru Məhəmmədhüseyn Sadiqi iyunun 25-də jurnalistlərlə görüşündə “terrorçu qruplarlar”la əlaqədə olan və onlara dəstək verən 50 nəfərin yaxalanmasından danışıb.

 

Sadiqi bildirib ki, son günlər Kirmanşah əyalətinin müxtəlif bölgələrində polis və təhlükəsizlik qüvvələrinin birgə keçirdiyi əməliyyatlarda terrorçu qruplaşmalarla əməkdaşlıq edən 50 nəfərdən çox adam həbs edilib: “Tutulanlardan külli miqdarda silah-sursat, partlayıcı maddələr, elektron qurğular və intihar kəmərləri aşkarlanaraq götürülüb. Hazırda hüquq-mühafizə qüvvələrimiz Kirmanşahın müxtəlif bölgələrində, o cümlədən də əyalətin sərhədyanı məntəqələrində vəziyyətə ciddi nəzarət edir və sərhəd zonasında atəşmaların getdiyi ilə bağlı irəli sürülən iddialar əsassızdır və biz yayılan bu kimi məlumatları təkzib edirik”.

 

 

Kirmanşah prokuroru, tutulan şəxslərin kimliyi və onların konkret hansı siyasi cərəyana bağlı olması barədə hər hansı bir məlumat verməyib.

 

Xatırladaq ki, İyunun 7-si sübh saat 10.30-da İran parlamentinə və Xomeyni məqbərəsinə silahlı hücum olub. 4 silahlı şəxs İran parlamentinin giriş qapılarındakı mühafizəçilərə atəş açaraq deputatların toplaşdığı zala daxil olmağa çalışıblar.  Atışma zamanı hücumçulardan biri özünü partladıb, 3-ü isə hökumət qüvvələri ilə atışmada həlak olub. Eyni hücum, Xomeyni məqbərəsinə də olub. İki silahlı şəxs məqbərə həndəvərinə yaxınlaşaraq mühafizəçi qüvvələrə odlu silahlardan atəş açıblar. Hücumçulardan biri özünü partlatsa da, digəri yaxalanıb. Hər iki olayda 18 nəfər ölüb, 52  nəfərdən çox insan yaralanıb.  

 

İnsidentdən bir neçə saat sonra İŞİD hər iki hücumun məsuliyyətini öz üzərinə götürüb. Az sonra isə hücumçuların İranın İŞİD-ə qoşulmuş kürd vətəndaşları olduğu bəlli olub.

 

A.M


HƏMÇİNİN OXUYUN

HƏMÇİNİN OXUYUN