İran rəsmisi: “Kürdistan əyalətində Tehran teraktları ilə əlaqədə olan daha 6 nəfər yaxalanıb”

İran rəsmisi: “Kürdistan əyalətində Tehran teraktları ilə əlaqədə olan daha 6 nəfər yaxalanıb”

GünAzTV: İranın Kürdistan əyalətinin baş prokuroru Əli Əkbər Gərusi iyunun 11-də jurnalistlərə açıqlamasında Tehran teraktları ilə əlaqədə olan daha 6 nəfərin həbs edilməsindən danışıb.

 

O bildirib ki, İranın təhlükəsizlik qüvvələri yerli hüquq-mühafizə qüvvələri ilə Kürdistan əyalətinin müxtəlif bölgələrində birgə əməliyyat keçirib: “Əməliyyat nəticəsində Tehrandakı terror aktları ilə birbaşa əlqədə olan 6 nəfər yaxalanıb. Tutulanlar hazırda dindirilir və terror olayları ilə bağlı daha bir neçə nəfərin kimliyi artıq müəyyənləşdirilib və həmin şəxslər də yaxın günlərdə həbs ediləcək.

 

Kürdistan ruhaniləri və yerli əhali Tehranda baş verən teraktlardan çox narahatdır. Elə buna görə də, onlar terrorçuların yaxalanması üçün hüquq-mühafizə qüvvələri ilə əməkdaşlıq edir, onlara yardım göstərirlər. Məhz bunun üçün də onlara öz təşəkkürümü bildirirəm”.

 

Əli Əkbər Gərusi, tutulan 6 nəfərin kimliyi barədə media nümayəndələrinə hər hansı bir məlumat verməyib. açıqlamayıb.

 

Xatırladaq ki, ETTELAAT rəhbəri Mahmud Ələvi iyunun 10-da dövlət televiziyasına açıqlamasında parlamentə və Xomeyni məqbərəsinə silahlı hücumlarla bağlı kürdlərin yaşadığı bölgələrdə, o cümlədən də Kirmanşah şəhərində daha 43 nəfərin yaxalanmasından və hər iki terakta rəhbərlik edən şəxsin ölkə sərhədlərindən kənarda öldürülməsindən xəbər vermişdi.

 

İyunun 7-si sübh saat 10.30 radələrində İran parlamentinə və Tehranın cənubunda olan Xomeyni məqbərəsinə qarşı silahlı hücum olub. Kimliyi bəlli olmayan 4 silahlı şəxs İran parlamentinin giriş qapılarındakı mühafizəçi qüvvələrə tapança və kalaşnikovla atəş açaraq deputatların toplaşdığı zala daxil olmağa çalışıblar.  Atışma zamanı hücumçulardan biri özünü partladıb, 3-ü isə parlament binasının şimal hissəsindəki korpuslardan birinə qaçaraq 4-cü mərtəbədə mövqe tutub atışmanı 5 saata qədər davam ediblər.

 

Eyni hadisə,Tehranın cənubunda yerləşən Xomeyninin məqbərəsinə də edilib. Bir neçə silahlı şəxs məqbərə həndəvərinə yaxınlaşaraq mühafizəçi qüvvələrə odlu silahlardan atəş açıblar. Hücumçulardan birinin isə özünü partlatdığı bildirilir. Hər iki olayda 17 nəfərin öldüyü, 50  nəfərdən çox insanın isə yaralandığı bildirilir.  

 

İnsidentdən bir neçə saat sonra İŞİD bəyanat yayaraq hər iki hücumun məsuliyyətini üzərinə götürüb. Az sonra isə isə hücumçuların İŞİD-ə qoşulmuş və milliyyətcə kürd olan İran vətəndaşları olduğu bəlli olub.

A.M

 


HƏMÇİNİN OXUYUN

HƏMÇİNİN OXUYUN