İranda daha 12 nəfər edam edilib

İranda daha 12 nəfər edam edilib

GünAzTV: İranın bir neçə şəhərində narkotik maddələrin qaçaqmalçılığında və qətldə günahlandırılan daha 12 nəfər edam edilib. Edamlar, Həsən Ruhaninin son prezident seçkilərində qalib gəlməsindən üç gün sonraya təsadüf edib.

 

İrandakı hüquq müdafiəçilərinin yaydığı məlumata əsasən, son iki gündə, narkotik maddələrin qaçaqmalçılığında günahlandırılan 50 yaşlı müttəhim Davər Həmdərd Ərdəbil  zindanında, 30 yaşlı müttəhim Əbdülkərim Şəhnəvazi Zahidan həbsxanasında, adları bilinməyən daha 2 nəfər isə Ərak zindanında dara çəkilib.

 

Həmçinin qətldə günahlandırılan 33 yaşlı müttəhim Mehrdad Əsgəri Kirmanşah həbsxanasında, adı açıqlanmayan daha bir müttəhim İsfahan zindanında, 5 müttəhim isə Təbriz həbsxanasında dar ağacından asılıb. Təbriz zindanında edam edilənlərdən 3-ünün adları (Kazım Hicabi, Seyid Əli Musəvi və Cabir Fəxri) mediaya açıqlanıb. Edam edilən digər iki müttəhimin kimliyi haqda məlumat yayılmayıb.

 

Habelə, 30 il əvvəl qətl törətdiyinə görə edama məhkum edilən və zindandan qaçaqraq 28 il gizli şəkildə yaşayan və həmin müttədə ailə qurub bir neçə uşaq atası olan, iki il əvvəl isə yenidən tutulan daha bir müttəhim, İranın Kərəc şəhərinin mərkəzi zindanında dar ağacından asılıb.

 

İranda edamların sayının kəskin artması, yerli və beynəlxalq hüquq təşkilatlarının ciddi narahatlığına səbəb olub. İran İslam Respublikası, ölkədə vətəndaşlara qarşı çıxarılan ölüm hökmlərinin sayına görə, dünyada Çindən sonra ikinci yeri tutur.

A.M


HƏMÇİNİN OXUYUN

HƏMÇİNİN OXUYUN