İranda prezident seçkiləri ərəfəsində milli azlıqlardan olan jurnalistlər təhdid edilib

İranda prezident seçkiləri ərəfəsində milli azlıqlardan olan jurnalistlər təhdid edilib

GünAzTV: İranda növbəti prezident seçkiləri ərəfəsində milli azlıqlardan olan bir qrup jurnalist son günlər təhlükəsizlik qurumları tərəfindən çağırılaraq təhdid edilib. Bu barədə Birləşmiş Ərəb Əmirliklərinin “Əl-Ərəbiyyə” telekanalı məlumat yayıb.

 

Məlumatda bildirilir ki, ötən həftə İranın yerli ərəblər yaşayan Xuzistan əyalətinin Əhvaz şəhərində “Sepah”ın ETTELAAT təşkilatı bir qrup jurnalistə və  ərəb fəallarına SMS göndərərək onları qarşıdan gələn prezident seçkiləri ilə bağlı keçirilən bir iclasa çağırıb. Bildirilir ki, çağırılan şəxslər iclasa buraxılmazdan əvvəl, onların mobil telefonları, noutbukları və diktafonları əllərindən alınıb, üst-başları yoxlanılıb. “Sepah”ın bir neçə komandirinin, eləcə də təhlükəsizlik qurumlarının bəzi rəsmilərinin də qatıldığı iclasda, “Sepah” komandirlərindən biri çxışa başlayaraq ərəb jurnalistləri dolayısıyla təhdid edərək onlara seçkilər zamanı milli tələblərin qabardılmasının yolverilməz olduğunu bildirib: “Bizim bölgənin ərəb ölkələri ilə, o cümlədən də Səudiyyə Ərəbistanı ilə ixtilaf və problemlərimiz son həddə çatıb. Elə buna görə də Səudiyyə Ərəbistanının müdaxiləçi hədəfləri istiqamətində aparılan hər hansı bir fəaliyyət, kəskin və inanılmaz dərəcədə sərt bir reaksiya ilə qarşılanacaq.

 

Jurnalistlərin bəzi məsələlərə, o cümlədən də su, işıq və qazın kəsilməsi, işsizlik, ətraf mühit, şəhər xidmətlərinin çatışmazlığı və cəmiyyətdəki ümumi problemlərə toxunmasında hər hansı bir maneə yoxdur. Lakin seçkilər zamanı milli kimlik məsələsini ortaya atmaq və onu qabartmaq, düşmən dəyirmanına su tökməkdən başqa bir şey deyil. Bu isə yolverilməzdir. Unutmayaq ki, bizim hamımızın kimliyi birdir. Biz hamımız iranlıyıq,  İran isə hamımızın vətəni sayılır. Elə buna görə də, “Sepah”, seçkilər atmosferindən istifadə olunmasına və bu şəraitdə hansısa milli kimlik məsələsinin qabardılmasına və bu sahədə aparılan hər hansı bir fəaliyyətə dözməyəcək”.

 

Eyni hadisənin, ölkənin qeyri-fars millətləri yaşayan bir sıra digər əyalətlərində də baş verdiyi bildirilir.

 

Qeyd edək ki, İranda növbəti prezident seçkiləri bu il, mayın 19-da (1396-cı il, ordibeheştin 29-da) keçiriləcək.

A.M


HƏMÇİNİN OXUYUN

HƏMÇİNİN OXUYUN