İranın Türbəti-Cam şəhərində saxta spirtdən zəhərlənənlərin sayı 149 nəfərə, ölənlərin sayı isə 13 nəfərə çatıb

İranın Türbəti-Cam şəhərində saxta spirtdən zəhərlənənlərin sayı 149 nəfərə, ölənlərin sayı isə 13 nəfərə çatıb

GünazTV: İranın Rəzəvi Xorasan əyalətinin Türbəti-Cam şəhərində saxta spirtdən zəhərlənənlərin sayı 149 nəfərə, ölənlərin sayı isə 13 nəfərə çatıb.

 

Bu barədə, Türbəti-Cam Tibb Elmləri Fakultetinin dekanı Məhəmməd Əfkar martın 23-də jurnalistlərə açıqlama verib.

 

O deyib ki, insanların özlərini koronavirusdan qorumaq üçün yanlış olaraq, spirtli içkilərə pənah aparması, onların görmə qabiliyyətlərini itirməsinə, böyrəklərinin sıradan çıxmasına və ölümünə gətirib çıxarır: “Saxta spirtdən həyatlarını itirən 13 nəfərdən bir neçəsi Türbəti-Cam şəhərinin Səccadiyyə xəstəxanasında, qalanları isə Məşhədin tibb mərkəzlərində keçiniblər.

 

Spirtdən zəhərlənən 149 nəfərə gəlincə, onların əksəriyyəti ayaqüstü müalicə aldıqdan sonra evə buraxılsa da, onlardan 29-u hazırda Türbəti-Cam və Məşhəd xəstəxanalarında müalicə alırlar. Həmin şəxslərdən 6-sının səhhəti ağırdır və onlar xüsusi həkim nəzarətində saxlanılırlar. Bir daha vətəndaşlara xəbərdarlıq edərək bildiririk ki, spirtli içkilər koronavirusa yoluxmanın qarşısını almır, insanı xəstəlikdən qorumur” - deyə, Türbəti-Cam Tibb Elmləri Fakultetinin dekanı Məhəmməd Əfkar mediaya açıqlamasında bəyan edib.

 

 

Qeyd edək ki, son həftələr İranın müxtəlif əyalətlərində koronavirusdan qorunmaq və stressdən qurtulmaq üçün spirtli içkilərə pənah aparanların sayı sürətlə artıb. Nəticədə, minlərlə insan saxta spirtdən zəhərlənərək xəstəxanalıq olub, yüzlərlə insan isə həyatını itirib.

 

 

A.M


HƏMÇİNİN OXUYUN

HƏMÇİNİN OXUYUN