İranlı deputat: "5 min nəfər edam növbəsindədir”

İranlı deputat:

GünAzTV: İran parlamentinin məhkəmə-hüquq komissiyasının üzvü Əli Bəxtiyar, aprelin 12-də jurnalistlərə açıqlamasında narkotik qaçaqmalçılığına qarşı mübarizə qanunundan və ona düzəliş edilməsi üçün hazırlanan layihədən danışıb.

 

Əli Bəxtiyar bildirib ki, ölkədə narkotik qaçaqmalçılığı ilə bağlı törədilən  cinayətin həcmi, verilən cəzaya uyğun deyil: “Hazırda narkotik maddə qaçaqmalçılığında günahlandırılaraq həbsxanalarda saxlanılan 5 min məhbus edam növbəsindədir. Onlar arasında elələri var ki, külli miqdarda narkotik maddənin silhla daşınması işinə başçılıq ediblər. Elələri də var ki, bu sahədə cinayət törətmələrinə baxmayaraq, onların haqqı edam deyil. Çünki, çox hallarda törədilən cinayətlə verilən cəzanın bir-biri ilə uyğunluğu yoxdur.

 

Hazırlanan və üzərində iş aparılan layihədə təklif edilir ki, irihəcmli narkotik qaçaqmalçılığında rolu olmayanlara edam və ya ömürlük həbs cəzası yerinə 25 ildən 30 ilə qədər həbs cəzası nəzərdə tutulsun və ya həmin şəxslər, 1 milyard rialdan 10 milyard riala qədər nağd pul cəriməsi ödəsinlər. Bununla belə, hesab edirəm ki, narkotik maddənin daşınmasında və ya müxtəlif yollarla yerbəyer olunmasında az yaşlı uşaqlardan istifadə edənlərə qarşı edam cəzası əvvəldə olduğu kimi qüvvədə saxlanılmalıdır”.

 

İranda edamların sayının kəskin artması, yerli və beynəlxalq hüquq təşkilatlarının ciddi narahatlığına səbəb olub. Edam edilənlərin əksəriyyətini isə narkotik maddə qaçaqmalçıları təşkil edir. İran İslam Respublikası hökuməti, ölkədə çıxarılan ölüm hökmlərinin sayına görə, dünyada Çindən sonra ikinci yeri tutur.

A.M


HƏMÇİNİN OXUYUN

HƏMÇİNİN OXUYUN