İranlı deputat: “Türkiyə, Arakan müsəlmanlarının durumu ilə bağlı bizdən daha yaxşı davrandı”

İranlı deputat: “Türkiyə, Arakan müsəlmanlarının durumu ilə bağlı bizdən daha yaxşı davrandı”

GünAzTV: İran parlamenti sədrinin müavini Əli Mütəhhəri sentyabrın 8-də “İsna” xəbər agentliyinə açıqlamasında Myanmarda müsəlmanlara qarşı edilən zorakılıqlardan danışaraq İran İslam Respublikasının Arakan müsəlmanlarının taleyinə biganə qalmamasından gileylənib.

 

Mütəhhəri deyib ki, Myanmardakı Rohingya müsəlmanlarına edilən zorakılıqların qarşısını yalnız hərbi yolla almaq mümkündür: “Bu gün Myanmar müsəlmanları dünyanın ən məzlum adamları sayılır. Lakin təəssüflər olsun ki, islam dünyasının onların acınacaqlı durumuna reaksiyası çox zəif olub. Bu barədə yalnız bir neçə etiraz aksiyası keçirilib. İslam Əməkdaşlıq Təşkilatının bununla bağlı hər hansı bir iclas çağırmasından söhbət belə getmir. Görəsən biz müsəlmanlar niyə NATO-ya bənzər ortaq bir hərbi ittifaq yaratmırıq ki, bu kimi hallarda meydana çıxıb müsəlmanlara yardım etsin. Hesab edirik ki, Myanmar hökumətinin müsəlmanlara qarşı törətdiyi cinayətlərini yalnız hərbi güclə dayandırmaq olar.

 

Düşünürəm ki, Myanmarda baş verənlərlə bağlı İrandan daha çox şeylər gözlənilir. Lakin təəssüflər olsun ki, biz islamın özündən çox şiəyə önəm və fikir veririk. Halbuki islam dini həm şiələri, həm də sünniləri əhatə edir. Etiraf edək ki, Türkiyə, Arakan müsəlmanlarının durumu ilə bağlı bizdən daha yaxşı davrandı. Rəsmi Ankara Bangladeşə dedi ki, Myanmardan qovulan müsəlmanların üzünə sərhədlərini aç və onları qəbul elə, xərcini biz ödəyəcəyik.

 

Belə çıxır ki, biz islam həmrəyliyinin anlamını olduğu kimi qanmamışıq. Çünki islam peyğəmbəri buyurur: “Hər kəs, zülmə və ədalətsizliyə məruz qoyulan bir müsəlmanın yardım istəyən səsini eşidib onun köməyinə getməsə, o şəxs müsəlman deyil”. Belə görünür ki, avropalılarla amerikalılar islam peyğəmbərinin bu əmrinə biz müsəlmanlardan daha yaxşı əməl edirlər”.

 

 

 

 

A.M


HƏMÇİNİN OXUYUN

HƏMÇİNİN OXUYUN